रास्वपा महामन्त्री विपिनकुमार आचार्यको नेतृत्वमा २० सदस्यीय टोली आगामी कात्तिक २९ गते चीन भ्रमणमा जाने

काठमाडौँ, कात्तिक २६ गते । राष्ट्रिय स्वतन्त्र पार्टी (रास्वपा) का महामन्त्री विपिनकुमार आचार्यको नेतृत्वमा २० सदस्यीय प्रतिनिधिमण्डल आगामी कात्तिक २९ गतेदेखि चीन भ्रमणमा जाने भएको छ।

चिनियाँ कम्युनिस्ट पार्टी (सीपीसी) को औपचारिक निमन्त्रणामा हुन लागेको यस भ्रमणलाई नेपाल र चीनबीचको राजनीतिक संवाद, आपसी समझदारी तथा विकास सहकार्यलाई थप सुदृढ गर्ने एक महत्त्वपूर्ण अवसरका रूपमा हेरिएको छ।

रास्वपाका प्रवक्ता जगदीश खरेलद्वारा जारी विज्ञप्ति अनुसार भ्रमणका क्रममा सुशासन, आर्थिक विकास, सार्वजनिक सेवा प्रवाह, संस्थागत क्षमता अभिवृद्धि र जन-अपेक्षा अनुसारको राजनीतिक नेतृत्व लगायतका विभिन्न महत्त्वपूर्ण विषयमा गहन छलफल तथा अनुभव आदान-प्रदान हुनेछ।

यस २० सदस्यीय उच्चस्तरीय प्रतिनिधिमण्डलमा रास्वपाका सांसदहरू गणेश पराजुली, हरि ढकाल, कवीन्द्र बुर्लाकोटी, लिमा अधिकारी आचार्य, समीक्षा बास्कोटा, सागर ढकाल, सुशान्त वैद्यिक, रिमा विश्वकर्मा, रमेशकुमार सापकोटा र गजला शमीम मिकरानी सहभागी हुनुहुन्छ। त्यसैगरी, टोलीमा धनञ्जय रेग्मी, श्रीराम न्यौपाने, राम लामा, पूनमकुमारी अग्रवाल, आनन्दबहादुर चन्द, सुजाता तामाङ, पुष्पाकुमारी चौधरी, अरविन्द शाह र रत्न थापा पनि सदस्यका रूपमा रहनुभएको छ।

प्रधानमन्त्री वालेन्द्र शाह नेतृत्वको सरकारले देशको आर्थिक तथा कूटनीतिक सम्बन्धलाई थप सुदृढ बनाउने उद्देश्यले छिमेकी तथा प्रमुख विकास साझेदार मुलुकहरूसँगको सहकार्यलाई प्राथमिकता दिइरहेका बेला हुन लागेको यो भ्रमणले दुई देशबीचको सम्बन्धलाई अझ प्रगाढ बनाउने विश्वास लिइएको छ।

चिनियाँ पक्षसँगको यस उच्चस्तरीय भेटवार्ता र संवादले नेपालको राजनीतिक स्थायित्व, सुशासन र विकास निर्माणका क्षेत्रमा सकारात्मक योगदान पुर्‍याउने अपेक्षा गरिएको छ।