सिंहदरबारको अधिकार गाउँगाउँमा पुर्‍याएको कारण कर्णाली लगायत पिछडिएका क्षेत्रको विकास सम्भव भयो : संयोजक प्रचण्ड

काठमाडौँ, कात्तिक २१ गते । नेपाली कम्युनिष्ट पार्टीका संयोजक तथा पूर्वप्रधानमन्त्री पुष्पकमल दाहाल ‘प्रचण्ड’ले कर्णाली लगायत पछाडि पारिएका क्षेत्रहरूको सर्वाङ्गीण विकासका लागि नै सिंहदरबारको अधिकारलाई वास्तविक अर्थमा गाउँगाउँमा पुर्‍याइएको स्पष्ट पार्नुभएको छ।

लेखकद्वय डा. दीपेन्द्र रोकाय र मोहनदास मानन्धरद्वारा लिखित ‘कर्णाली उपेक्षा र उज्यालो’ पुस्तकको विमोचन समारोहलाई सम्बोधन गर्दै संयोजक दाहालले लामो समयदेखि विभेदमा परेका वर्ग र भौगोलिक क्षेत्रलाई समृद्धिको मार्गमा अग्रसर गराउन आफ्नो प्रधानमन्त्रीय कार्यकालमा कर्णाली क्षेत्रमा पूर्वाधार विकासका प्रमुख आधारहरू तयार गरिएको दाबी गर्नुभयो।

पूर्व–पश्चिम मध्यपहाडी लोकमार्ग र उत्तरदक्षिण करिडोरजस्ता रणनीतिक सडक सञ्जालको निर्माणले देशलाई सुदृढ ढङ्गले एकताबद्ध बनाएको उल्लेख गर्दै उहाँले अब कर्णालीका स्थानीय उत्पादन जस्तै स्याउ बाहिरी बजारमा पुर्‍याउन र तराईका खाद्यान्न कर्णालीमा सहजै लैजान कुनै कठिनाई नरहेको बताउनुभयो। रणनीतिक सोच र दूरदर्शिता बिना यस्ता राष्ट्रिय गौरवका विकास आयोजनाहरू अगाडि बढाउन सम्भव नहुने उहाँको तर्क थियो।

कार्यक्रममा संयोजक दाहालले आफ्नो नेतृत्वको पहिलो गणतान्त्रिक सरकारका पालामा कर्णालीको मुहार फेर्न १० हजार ८०० मेगावाट क्षमताको कर्णाली–चिसापानी आयोजना, तिला–१ र तिला–२ जलविद्युत आयोजना अघि बढाउन विशेष पहल गरिएको स्मरण गराउनुभयो।

साथै, सामरिक महत्त्व बोकेको हिल्सा–सुर्खेत सडक निर्माणको कार्यलाई चिनियाँ सहयोगमा अगाडि बढाउने सन्दर्भमा समेत सैद्धान्तिक समझदारी भइसकेको उहाँले जानकारी दिनुभयो।

यस पुस्तकले कर्णाली क्षेत्रको ऐतिहासिक उपेक्षा, वर्तमान अवस्था र उज्जवल भविष्यको सम्भावनालाई नजिकबाट उजागर गर्ने विश्वास लिइएको छ।