सञ्चारमन्त्री डा. तिमिल्सिना अन्तर्राष्ट्रिय दूरसञ्चार संघको महासम्मेलनमा सहभागी हुन कतार प्रस्थान गर्दै

काठमाडौं, कात्तिक २० गते । सूचना तथा सञ्चारमन्त्री डा. विक्रम तिमिल्सिना अन्तर्राष्ट्रिय दूरसञ्चार संघ (आइटियू) को महासम्मेलनमा सहभागी हुन कतारको दोहा प्रस्थान गर्नुहुने भएको छ।

आगामी नोभेम्बर ७ देखि १३ सम्म सञ्चालन हुने उक्त भ्रमणका क्रममा मन्त्री तिमिल्सिनासँगै सूचना तथा सञ्चार मन्त्रालयका सचिव राजेन्द्रकुमार पौडेल र मन्त्रालयका एक जना अधिकारीसमेत सहभागी हुने मन्त्रालयले जनाएको छ। संयुक्त राष्ट्रसंघको सूचना तथा सञ्चार प्रविधिसम्बन्धी विशिष्टीकृत संस्था आइटियूको यो महासम्मेलन प्रत्येक चार वर्षमा आयोजना हुने सर्वोच्च नीति निर्धारण गर्ने सम्मेलन हो।

यस महासम्मेलनमा संघको आगामी कार्यदिशा, रणनीतिक प्राथमिकता र नेतृत्व निर्धारण हुनुका साथै आइटियूको उच्च व्यवस्थापन टोली, परिषद्का सदस्य राष्ट्र तथा रेडियो नियमावली बोर्डका सदस्यहरूको निर्वाचनमा नेपालले सहभागिता जनाएर मतदान गर्ने कार्यक्रम रहेको छ। यसले अन्तर्राष्ट्रिय दूरसञ्चार क्षेत्रका नीति तथा निर्णय प्रक्रियामा नेपालको सक्रिय प्रतिनिधित्व र पहिचानलाई थप सुदृढ गर्ने अपेक्षा गरिएको छ।

महासम्मेलनको अवसरमा सञ्चारमन्त्री तिमिल्सिनाद्वारा विभिन्न मुलुकका समकक्षी मन्त्रीहरूसँग द्विपक्षीय भेटवार्ता गर्ने कार्यक्रमसमेत तय गरिएको छ। भेटवार्ताका क्रममा दूरसञ्चार क्षेत्रको विकास, सेवाको गुणस्तर सुधार, डिजिटल पहुँच विस्तार तथा आधुनिक सञ्चार प्रविधिको उपयोगजस्ता विषयमा सफल अभ्यास र अनुभव आदान-प्रदान हुनेछ।

अन्तर्राष्ट्रिय दूरसञ्चार नीति निर्माणमा सक्रिय सहभागिता जनाउँदै नेपालको डिजिटल रूपान्तरण र दूरसञ्चार क्षेत्रको आधुनिकीकरणका लागि अन्तर्राष्ट्रिय सहकार्य विस्तार गर्नु यस भ्रमणको प्रमुख उद्देश्य रहेको बताइएको छ।