एनपीएल: जनकपुरलाई १६ रनले पराजित गर्दै लुम्बिनी लायन्सले शीर्ष स्थानमा ३ अंकको अग्रता

काठमाडौँ, कात्तिक १९ गते । नेपाल प्रिमियर लिग (एनपीएल) क्रिकेटमा लुम्बिनी लायन्सले आफ्नो उत्कृष्ट प्रदर्शनलाई निरन्तरता दिँदै अंक तालिकामा शीर्ष स्थानलाई थप मजबुत बनाएको छ।

बिहीबार भएको बहुप्रतिक्षित ‘च्याम्पियन क्ल्यास’ मा गत सिजनको विजेता लुम्बिनीले पहिलो सिजनको विजेता जनकपुर बोल्ट्सलाई १६ रनले पराजित गर्न सफल भयो। यस जितसँगै हालसम्मका खेलमा अपराजित रहेको लुम्बिनीले ४ खेलबाट १० अंक जोड्दै अन्य टोलीभन्दा ३ अंक बढीको स्पष्ट अग्रता कायम गरेको छ भने जनकपुरको भने ५ खेलमा यो तेस्रो हार हो।

टस हारेर पहिले ब्याटिङको निम्तो पाएको लुम्बिनीले निर्धारित २० ओभरमा ८ विकेट गुमाउँदै १ सय ४९ रनको चुनौतीपूर्ण योगफल तयार पारेको थियो। खेलको पहिलो बलमै ओपनर डीआरसी शट आउट भए पनि कप्तान रोहित पौडेलले सर्वाधिक ३८ रनको योगदान दिए। यसैगरी निरोशन डिकवेलाले २७, दिलीप नाथले २५ र आसिफ शेखले २१ रन बनाए। जनकपुरका लागि विशाल सुस्लिङ र राहुल यादवले समान २–२ विकेट लिएका थिए।

जवाफमा १ सय ५० रनको विजयी लक्ष्य पछ्याएर ब्याटिङमा उत्रिएको जनकपुरले १० ओभरमै ५५ रन जोड्दासम्म ५ महत्वपूर्ण विकेट गुमाइसकेको थियो। मध्यक्रममा कप्तान हरमित सिंहले ३३ रन र आदित्य महताले नटआउट ३० रन बनाए पनि टोलीलाई जिताउन सकेनन्। जनकपुर २० ओभरमा ८ विकेट गुमाउँदै १ सय ३३ रनमा सीमित हुन पुग्यो। लुम्बिनीका लागि डीआरसी शटले ३ तथा तिलक र शेर मल्लले २–२ विकेट लिएर टिमको जित सुनिश्चित गरे।

गत सिजनदेखि अपराजित रहँदै आएको लुम्बिनी लायन्सको यो प्रदर्शनले जारी प्रतियोगितामा टोलीको मनोबल उच्च देखाएको छ भने जनकपुरले आगामी खेलहरूमा आफ्नो रणनीतिमा सुधार गर्नुपर्ने दबाब बढेको छ।