रास्वपा सचेतक कविन्द्र बुर्लाकोटीद्वारा पाँच महिने कार्यप्रगति सार्वजनिक : संसद्मा ९७ प्रतिशत उपस्थिति र जनसरोकारका मुद्दालाई प्राथमिकता

गोरखा, कात्तिक १९ गते । गोरखा क्षेत्र नं. २ का प्रतिनिधिसभा सदस्य तथा राष्ट्रिय स्वतन्त्र पार्टी (रास्वपा) का संसदीय दलका मुख्य सचेतक कविन्द्र बुर्लाकोटीले आफ्नो पाँचमहिने कार्यप्रगति विवरण (रिपोर्ट कार्ड) सार्वजनिक गर्नुभएको छ।

गोरखा सदरमुकाममा आयोजित एक पत्रकार सम्मेलनमार्फत उहाँले यस अवधिमा संसद्मा ९७ प्रतिशत उपस्थिति जनाउँदै जनसरोकारका विषयहरूलाई सशक्त रूपमा उठाएको जानकारी दिनुभएको हो। विशेषगरी बुढीगण्डकी र भोटेकोशी बाढीबाट प्रभावित नागरिकको उद्धार, राहत तथा क्षतिग्रस्त भौतिक संरचनाको पुनर्निर्माणका लागि सम्बन्धित निकायसँग आवश्यक समन्वय गरिएको उहाँको भनाइ छ।

जनप्रतिनिधिका रूपमा आफूले प्राप्त गर्ने सेवा-सुविधाबाट पालुङटार नगरपालिका–३ का अतिविपन्न तथा बाढीमा बेपत्ता भएका तीन परिवारलाई खाद्यान्न वितरण गर्नुका साथै हावाहुरीले छानो उडेका दुई परिवारलाई घर छाउन आर्थिक सहयोग प्रदान गरेको उहाँले खुलाउनुभयो।

विपद् प्रभावित क्षेत्रका वडा तथा गाउँपालिकामा राहत र पुनर्निर्माणका काम विपद् जोखिम न्यूनीकरण तथा व्यवस्थापन प्राधिकरणमार्फत भइरहेको बताउँदै उहाँले कुनै समस्या भए सिधै जानकारी गराउन आग्रह गर्नुभयो। केन्द्र सरकारका तर्फबाट गर्नुपर्ने आवश्यक पहलका लागि आफू सधैँ तत्पर रहेको उहाँको प्रतिबद्धता थियो।

जिल्लामा भइरहेको विकास निर्माणको गति सन्तोषजनक नरहेको र खानेपानी आयोजनाहरू समेत अलपत्र परेको प्रति असन्तुष्टि व्यक्त गर्दै मुख्य सचेतक बुर्लाकोटीले विकास आयोजनाहरूमा हुने ढिलासुस्ती अब किमार्थ स्वीकार्य नहुने स्पष्ट पार्नुभयो। वर्तमान सरकारले विकास निर्माणका कामको निरन्तर निगरानी सुरु गरेको बताउँदै उनले यसलाई व्यवस्थित रूपमा अगाडि बढाइने दृढता व्यक्त गर्नुभयो।

साथै, शिक्षकहरूलाई राजनीतिक दलको आबद्धता त्याग्न आग्रह गर्दै उहाँले दलमा आबद्ध भएको पाइएमा कानुनबमोजिम कडा कारबाही हुने चेतावनीसमेत दिनुभयो।

पाँच महिनाको यस अल्पकालीन समीक्षाले सांसद बुर्लाकोटीको जनताप्रतिको उत्तरदायित्व र पारदर्शिता झल्काएको छ। जनगुनासो सम्बोधन गर्ने र विकास निर्माणलाई तीव्र पार्ने उहाँको यो कदमले गोरखावासीमा सकारात्मक सन्देश प्रवाह गरेको छ।