जाडोयाम सुरुसँगै वायु प्रदूषणको जोखिम: काठमाडौँ महानगरद्वारा प्लास्टिकजन्य फोहर नबाल्न आग्रह

काठमाडौँ, कात्तिक १९ गते । जाडो मौसम सुरु भएसँगै वायु प्रदूषणको जोखिम उच्च बन्दै गएको भन्दै काठमाडौँ महानगरपालिकाले खुला रूपमा प्लास्टिकजन्य फोहरमैला नबाल्नका लागि सबैमा कडा आग्रह गरेको छ।

वातावरण विभागका प्रमुख सरिता राईका अनुसार काठमाडौँ उपत्यकामा वायु प्रदूषण बढ हुनुका प्रमुख कारणहरूमा सवारीसाधनबाट निस्कने धुवाँ, सडक तथा अन्य पूर्वाधार निर्माणका क्रममा उत्पन्न हुने धुलोधुवाँ, कल-कारखानाका उत्सर्जन र खुला रूपमा प्लास्टिक जलाउँदा निस्कने विषालु धुवाँ रहेका छन्। यी गतिविधिले सहरको वायुमण्डललाई थप दूषित बनाउँदै लगेको छ।

बढ्दो वायु प्रदूषणका कारण विशेषगरी बालबालिका, ज्येष्ठ नागरिक, दम, खोकी तथा अन्य दीर्घरोगबाट पीडित बिरामीहरू बढी जोखिममा पर्ने भएकाले स्वास्थ्य सुरक्षालाई मध्यनजर गर्दै यस्ता कार्य नगर, नगराउन महानगरले अपिल गरेको छ। विभागले सवारीसाधनहरूलाई प्रचलित प्रदूषण नियन्त्रण मापदण्डभित्र मात्र चलाउन, नियमित रूपमा मर्मत गर्न, निर्माण सामग्रीहरू सडक तथा फुटपाथमा नथुपार्न र उद्योग तथा अस्पतालहरूले ‘कामपा प्रदूषण नियन्त्रण मापदण्ड २०८१’ को पूर्णपालना गर्न निर्देशन दिएको छ।

उद्योग, कल-कारखाना तथा व्यापारिक प्रतिष्ठानहरूले वायु प्रदूषण न्यूनीकरण गर्ने आधुनिक उपकरणहरूको अनिवार्य प्रयोग गर्नुपर्नेमा जोड दिइएको छ। यस प्रकारका मापदण्डको उल्लङ्घन गर्नेहरूमाथि नियम अनुसारको प्रशासनिक कारबाहीको दायरासमेत कडा पारिने महानगरले संकेत गरेको छ।

वायु प्रदूषणको यो समस्या कुनै एक निकायको मात्र नभई सम्पूर्ण नागरिकको साझा समस्या भएकाले यसको समाधानका लागि सामूहिक सचेतना र जिम्मेवारीबोधको खाँचो रहेको छ। जन-स्वास्थ्यमा पर्न सक्ने असरलाई रोक्न महानगरको यो कदमले सहरी वातावरण सुधार गर्न महत्त्वपूर्ण योगदान पुर्‍याउने अपेक्षा गरिएको छ।