ऊर्जामन्त्री श्रेष्ठको निर्देशन: “चाडपर्वमा निर्बाध विद्युत् आपूर्ति सुनिश्चित गर्न र सुक्खायामका लागि पूर्वतयारी गर्नू”

काठमाडौँ, कात्तिक १७ गते । ऊर्जा, जलस्रोत तथा सिँचाइ मन्त्री विराजभक्त श्रेष्ठले चाडपर्वका समयमा निर्बाध विद्युत् आपूर्ति सुनिश्चित गर्न र त्यसलगत्तै सुरु हुने सुक्खायामको विद्युत् व्यवस्थापनका लागि पूर्वतयारी तथा योजनाबद्ध कामलाई प्राथमिकता दिन मातहतका निकायलाई कडा निर्देशन दिनुभएको छ।

प्राधिकरण सञ्चालन समितिको बैठकअघि कार्यकारी निर्देशक तथा उच्च कर्मचारीहरूसँगको छलफलका क्रममा मन्त्री श्रेष्ठले तिहार तथा छठ पर्वमा विद्युत् आपूर्ति नियमित र अवरोधरहित बनाउन माग र आपूर्तिको पूर्वानुमान गरी आवश्यक प्रबन्ध मिलाउन आग्रह गर्नुभएको हो।

चाडपर्वका बेला विद्युत् खपत बढ्न सक्ने यथार्थतालाई मध्यनजर गर्दै कुनै पनि क्षेत्रमा अनावश्यक रूपमा विद्युत् अवरोध नहुने र मागअनुसार पर्याप्त आपूर्ति हुने भरपर्दो व्यवस्था मिलाउन उहाँले स्पष्ट निर्देशन दिनुभएको छ। पर्वको समयमा आम उपभोक्ताले सहज रूपमा विद्युत् सेवा प्राप्त गर्न सकून् भन्नका लागि सुरक्षा र प्राविधिक तयारीलाई चुस्त राख्नुपर्नेमा उहाँको जोड रहेको थियो।

त्यसैगरी, आगामी सुक्खायाममा विद्युत् आपूर्तिलाई थप भरपर्दो र नियमित बनाउन आन्तरिक उत्पादनको अवस्था तथा विद्युत् आयातको सम्भावनाबारे समेत गहिरो विश्लेषण गर्न मन्त्री श्रेष्ठले प्राधिकरणलाई निर्देशन दिनुभएको छ। सुक्खायाममा हुन सक्ने माग र उपलब्ध विद्युत्को वास्तविक मूल्याङ्कन गरी आपूर्ति व्यवस्थापनका लागि चालिनुपर्ने कदमसहित आगामी बैठकमा विस्तृत कार्ययोजना पेस गर्न उहाँले ताकेता गर्नुभएको छ।

मन्त्रीको यस निर्देशनले एकातिर चाडपर्वका समयमा हुने विद्युत् कटौतीको समस्याबाट आम नागरिकलाई राहत दिनेछ भने अर्कोतर्फ सुक्खायामको ऊर्जा सङ्कटलाई टार्न अग्रिम योजना बनाउन सहयोग पुग्ने विश्वास गरिएको छ।