अमेरिकामा डेमोक्रेट्सको ऐतिहासिक विजय : रिपब्लिकनका गढ भत्काउँदै सिनेट र प्रतिनिधिसभामा शानदार सफलता

काठमाडौँ, कात्तिक १८ गते । अमेरिकी राजनीतिमा निर्वाचनपूर्वका अनुमानविपरीत डेमोक्रेट्सका लागि अत्यन्त अनुकूल परिणाम आएको छ। परम्परागत रूपमा रिपब्लिकन पार्टीको बलियो प्रभाव क्षेत्र मानिएका राज्यहरूमा समेत डेमोक्रेटिक उम्मेदवारहरूले ऐतिहासिक जित हासिल गरेका छन्।

टेक्सासमा जेम्स टालारिकोले विगत ३८ वर्षयता पहिलो पटक डेमोक्रेटिक सिनेट जित्दै इतिहास रचेका छन् भने दक्षिण क्यारोलिना र क्यानसासमा समेत दशकौँदेखिको रिपब्लिकन एकाधिकारलाई डेमोक्रेट्सले ताडेका छन्। तल्लो सदन प्रतिनिधिसभामा पनि एसोसिएटेड प्रेस (एपी) को प्रक्षेपण अनुसार डेमोक्रेटिक पार्टी स्पष्ट बहुमततर्फ अग्रसर रहेको छ।

बढ्दो मूल्यवृद्धि, आप्रवासनमा गरिएको कडाइ र इरान युद्धजस्ता मुद्दाहरूलाई डेमोक्रेट्सले चुनावी मैदानमा प्रमुख रूपमा उठाएका थिए। एपीसहितका प्रमुख सञ्चारमाध्यमका अनुसार झन्डै १० मध्ये ९ जना मतदाताले आफ्नो जीवनयापनको बढ्दो खर्च मतदानको मुख्य निर्णायक कारक रहेको बताएका छन्।

सन् २०२४ मा महँगी नियन्त्रण गर्ने वाचा गरेर सत्तामा आएका राष्ट्रपति ट्रम्पका नीतिहरूले जनजीवन थप नाजुक बनाएपछि मतदाताहरू रुष्ट बनेका थिए। सर्वेक्षणमा सहभागी दुई तिहाइभन्दा बढी मतदाताले महँगीका लागि ट्रम्पलाई नै जिम्मेवार ठहर्याएका छन्।

यद्यपि, संसद्का दुवै सदनमा प्राप्त यो बलियो जनमत डेमोक्रेट्सका लागि ठुलो अवसरसँगै ठुलो दबाब पनि बन्नेछ। अब उनीहरूले केवल ट्रम्पको विरोध गरेर मात्र छुट पाउने छैनन्, बरु जनताका आर्थिक चिन्ता र दैनिक जीवनका समस्याहरूलाई जिम्मेवार ढङ्गले सम्बोधन गर्नुपर्नेछ। राष्ट्रपति ट्रम्पसँग भिटो अधिकार कायम रहने र कानुन निर्माणमा अवरोध गर्न सक्ने सम्भावना रहे पनि ट्रम्पले निर्वाचन परिणाम स्वीकार गर्दै सहकार्य गर्न तयार रहेको बताएका छन्।

ट्रम्पको अत्यधिक सक्रियता र उनका विवादास्पद एजेन्डाका कारण रिपब्लिकन उम्मेदवारहरूले ठुलो मूल्य चुकाउनुपरेको विश्लेषकहरूको ठहर छ। देशको वर्तमान आर्थिक दिशाप्रति क्रुद्ध रहेका मतदाताहरूले ट्रम्पका नीतिको भारी बोकेका रिपब्लिकन उम्मेदवारहरूलाई पराजित गर्दै राजनीतिक रूपमा कडा संदेश दिएका छन्।