मलाई लाग्छ म ‘मिस्टर भिटो’ बन्नेछु : राष्ट्रपति डोनाल्ड ट्रम्प

काठमाडौँ, कात्तिक १६ गते । अमेरिकी राष्ट्रपति डोनाल्ड ट्रम्पको ह्वाइट हाउसले संसद् (कंग्रेस) मा डेमोक्रेटिक पार्टीको सम्भावित नियन्त्रणलाई ध्यानमा राख्दै विगत केही महिनादेखि विशेष पूर्वतयारी गरिरहेको छ।

रोयटर्सलाई प्राप्त जानकारी अनुसार, यदि कंग्रेसमा बहुमत गुमाएको खण्डमा ट्रम्पले आफ्ना प्रमुख एजेन्डालाई अगाडि बढाउन कार्यकारी अधिकारको प्रयोगलाई प्राथमिकता दिनेछन्। उप-प्रमुख स्टिफन मिलर र बजेट निर्देशक रसेल भाउट लगायतका उच्च अधिकारीहरूले गत अप्रिलदेखि नै आप्रवासन, भन्सार महसुल, आवास लागत र संघीय खर्चसम्बन्धी कदमहरूलाई कार्यकारी आदेशमार्फत कार्यान्वयन गर्ने योजना बनाइरहेका छन्।

ट्रम्पले संसद्लाई छलेर नयाँ कानुनबिना नै राष्ट्रिय संकटकाल लागू गर्दै भन्सार महसूल लगाउने, आप्रवासन नियन्त्रण कडा पार्ने र संघीय कर्मचारी घटाउने जस्ता निर्णयहरू गर्दै आएका छन्। यदि रिपब्लिकनहरूले कंग्रेसमा बहुमत गुमाएमा, डेमोक्रेट्ससँग कुनै पनि सम्झौतामा पुग्नुअघि आफूले एक वा दुई महिनासम्म ‘मिस्टर भिटो’ बनेर निर्णयहरू अल्झाउन सक्ने ट्रम्पले बताएका छन्।

सिनेटको नियन्त्रण पाएमा डेमोक्रेट्सले सर्वोच्च अदालतका न्यायाधीशसहित ट्रम्पका सबै न्यायिक तथा कार्यकारी उम्मेदवारहरूलाई रोक्न सक्ने राजनीतिक विश्लेषकहरूको भनाइ छ।

संसद्बाट हुन सक्ने सम्भावित अनुसन्धान र सोधपुछको सामना गर्न पनि ह्वाइट हाउसले रक्षात्मक तयारी गरेको छ। ह्वाइट हाउसका वकिलहरूले राजनीतिक नियुक्ति पाएका व्यक्तिहरूलाई संसदीय सोधपुछका क्रममा अपनाउने रणनीतिका बारेमा ब्रिफिङ गरिसकेका छन्। ट्रम्पले आफ्ना निजी सल्लाहकारहरूसँगका कुराकानीलाई जोगाउन ‘कार्यकारी विशेषाधिकार’ प्रयोग गर्न न्याय मन्त्रालयसँग कानुनी राय समेत मागेका छन्।

हाल कंग्रेसमा रिपब्लिकनहरूको अति साँघुरो बहुमत रहेको छ भने आगामी चुनावले अमेरिकी राजनीतिको आगामी दिशा-निर्देश तय गर्नेछ। डेमोक्रेट्सको बहुमत आएको अवस्थामा संसद् र ह्वाइट हाउसबीच कार्यकारी अधिकारको प्रयोगलाई लिएर थप टकराव बढ्ने निश्चितप्रायः देखिन्छ।