शुक्लाफाँटाका जंगली हात्तीमा रेडियो कलर जडान गरिँदै : मानव–वन्यजन्तु द्वन्द्व न्यूनीकरणमा सहयोग पुग्ने अपेक्षा

कञ्चनपुर, कात्तिक १५ गते । कञ्चनपुरस्थित शुक्लाफाँटा राष्ट्रिय निकुञ्जको मध्यवर्ती क्षेत्रमा लामो समयदेखि बस्तीमा पसी जन-धन र बाली-नालीमा क्षति पुर्‍याउँदै आएका जंगली हात्तीहरूको निगरानीका लागि रेडियो कलर जडान गर्ने प्रक्रिया अघि बढाइएको छ।

राष्ट्रिय निकुञ्ज तथा वन्यजन्तु संरक्षण विभागले शुक्लाफाँटा राष्ट्रिय निकुञ्ज कार्यालयलाई हात्तीको आवागमनसम्बन्धी भरपर्दो सूचना सङ्कलन गर्न र मानव–वन्यजन्तु द्वन्द्व न्यूनीकरण गर्न तत्काल रेडियो कलर जडानको कार्य अगाडि बढाउन निर्देशन दिएको छ।

रेडियो कलरबाट प्राप्त हुने तथ्याङ्कहरूको नियमित अनुगमन तथा विश्लेषण गरी हात्तीको चाल-चलन र बस्तीतर्फ प्रवेश गर्ने सम्भावित जोखिमको पहिल्यै पूर्वानुमान गर्ने विभागको मुख्य उद्देश्य रहेको छ। कृषिमन्त्री गीता चौधरीले रेडियो कलरको प्रयोगले हात्तीको गतिविधिको सही जानकारी पाउनुका साथै स्थानीय समुदायलाई समयमै सचेत गराउन सकिने बताउनुभएको छ। यसबाट मानवीय क्षति तथा भौतिक सम्पत्ति र बाली-नालीमा हुने नोक्सानी धेरै हदसम्म न्यूनीकरण हुने उहाँको विश्वास छ।

रेडियो कलर जडानको यो संवेदनशील कार्य निकुञ्जका वरिष्ठ संरक्षण अधिकृतको प्रत्यक्ष सुपरिवेक्षण र विशेष पशु चिकित्सकसहितको दक्ष प्राविधिक टोलीको समन्वयमा सम्पन्न गरिनेछ। हात्तीको समग्र सुरक्षा र स्वास्थ्यलाई उच्च प्राथमिकतामा राख्दै पूर्ण रूपमा वैज्ञानिक विधिबाट रेडियो कलर जडान गरिने र त्यसपश्चात् निरन्तर अनुगमन गरिँदै लगिने मन्त्री चौधरीले जानकारी दिनुभयो।

मानव र वन्यजन्तुबीचको द्वन्द्वले ग्रसित मध्यवर्ती क्षेत्रका बासिन्दाहरूका लागि यो कदम अत्यन्तै राहतदायक हुने अपेक्षा गरिएको छ। यस प्रविधिको सफल प्रयोगले हात्तीको संरक्षणसँगै स्थानीयको जीउधनको सुरक्षा गर्न समेत महत्त्वपूर्ण योगदान पुर्‍याउनेछ।