सुनकोशी–मरिण डाइभर्सन आयोजनाको नयाँ ठेक्का प्रक्रिया अचानक रद्द : अधिकारीहरू नियन्त्रणमा परेपछि काम थप अन्योलमा

सिन्धुली, कात्तिक १५ गते । राष्ट्रिय गौरवको सुनकोशी–मरिण डाइभर्सन बहुउद्देश्यीय आयोजना अन्तर्गत सुनकोशी नदीमा बाँध र विद्युत्गृह निर्माणका लागि अघि बढाइएको नयाँ ठेक्का प्रक्रिया रद्द गरिएको छ।

आयोजनाले शुक्रबार एक सूचना जारी गर्दै सिभिल, हाइड्रो-मेकानिकल तथा सम्बन्धित संरचना निर्माणका लागि आह्वान गरिएको बोलपत्र प्रक्रिया सार्वजनिक खरिद ऐन, २०६३ को दफा ३ को उपदफा २ को व्यवस्था अनुसार रद्द भएको जनाएको हो। आयोजनाका सूचना अधिकारी अशोक गौतमले ठेक्का रद्द भएको पुष्टि गरे पनि यसको स्पष्ट कारणबारे आफू बुझ्ने क्रममा रहेको प्रतिक्रिया दिनुभएको छ।

यसअघि काम सन्तोषजनक नभएपछि पटेल–रमण जेभीसँगको ठेक्का तोडिएपछि नयाँ प्रक्रिया थालिएको थियो। नयाँ ठेक्काका लागि ६ वटा कम्पनीले प्रस्ताव पेस गरेकामा चाइना इन्टरनेसनल वाटर एन्ड इलेक्ट्रिक कर्पोरेसन, अन्नेग–आरसिसी जेभी र सिन्नोहाइड्रो कर्पोरेसन को प्राविधिक प्रस्ताव स्वीकृत भई आर्थिक प्रस्ताव खोल्ने तयारी अन्तिम चरणमा पुगेको थियो। कात्तिक १६ गते आर्थिक प्रस्ताव खोल्ने मिति तोकिएको बेला प्रक्रिया रद्द भएपछि आयोजनाको बाँधतर्फको निर्माण कार्य थप अन्योलमा धकेलिएको छ।

यसैबीच, ठेक्का प्रक्रियाको अन्तिम चरणमा पुगेको बेला सिँचाइ विभागका महानिर्देशक दिनेश रजौरिया र आयोजना निर्देशक कृष्णप्रसाद रिजाललाई प्रहरीले बिहीबार नियन्त्रणमा लिएको छ। यद्यपि उनीहरूलाई पक्राउ गर्नुको यथार्थ कारण भने सम्बन्धित निकायबाट आधिकारिक रूपमा बाहिर आइसकेको छैन। सिन्धुली क्षेत्र नं. २ का सांसद तथा पूर्वाधार विकास समितिका सभापति आशिष गजुरेलले पनि अचानक ठेक्का रद्द हुनुको कारणबारे आफूले खोजी गरिरहेको बताउनुभएको छ।

आयोजना अन्तर्गत कुसुमटारदेखि सुनकोशी नदीसम्मको १३.३ किलोमिटर लामो सुरुङ निर्माण भने यसअघि नै सम्पन्न भइसकेको छ। सुनकोशीमा बाँध बाँधेर प्रतिसेकेन्ड ६७ घनमिटर पानी मरिण खोलामा खसाल्ने महत्त्वाकाङ्क्षी यो आयोजनाको मुख्य सिभिल संरचनाको ठेक्का रद्द र उच्च पदस्थ अधिकारीहरूको पक्राउले राष्ट्रिय गौरवको यो आयोजना फेरि एकपटक अनिश्चिततामा परेको छ।