वर्षाका कारण एनपिएल अन्तर्गतको लुम्बिनी र चितवनबीचको खेल रद्द : दुवै टोलीले बाँडे एक–एक अङ्क

काठमाडौँ, कात्तिक १४ गते । तेस्रो संस्करणको नेपाल प्रिमियर लिग (एनपिएल) अन्तर्गत आज शनिबार हुने भनिएको लुम्बिनी लायन्स र चितवन राइनोजबीचको खेल लगातारको वर्षाका कारण स्थगित गरिएको छ।

बिहीबार रातिदेखि परेको अविरल वर्षाका कारण कीर्तिपुरस्थित त्रिभुवन अन्तरराष्ट्रिय क्रिकेट मैदान पूर्ण रूपमा भिजेपछि मैदान खेल सञ्चालन गर्न योग्य नभएको नेपाल क्रिकेट सङ्घ (क्यान) का सचिव पारस खड्काले पुष्टि गर्नुभएको छ। खेल रद्द भएपछि प्रतियोगिताको नियमअनुसार लुम्बिनी र चितवनले अंक तालिकामा एक–एक अङ्क बाँडेका छन्।

गत कात्तिक ९ गतेदेखि सुरु भएको यस रोमाञ्चक एनपिएल प्रतियोगिता आगामी मङ्सिर ५ गतेसम्म सञ्चालन हुने तालिका रहेको छ। तर, पछिल्लो समय मौसममा आएको अचानकको फेरबदल र वर्षाका कारण प्रतियोगिताका खेलहरू प्रभावित बन्न पुगेका छन्। यसअघि पनि वर्षाकै कारण मैदानमा पानी जम्ने समस्याले खेल सञ्चालनमा कठिनाइ उत्पन्न हुँदै आएको छ।

आजै अपराह्न ५:०० बजेबाट सुरु हुने भनिएको दोस्रो खेलमा विराटनगर किङ्स र सुदूरपश्चिम रोयल्सबीच प्रतिस्पर्धा हुने निर्धारित तालिका रहेको छ। तथापि, निरन्तरको मौसम खराबी र वर्षाको सम्भावना कायमै रहेका कारण साँझको उक्त खेलसमेत प्रभावित हुन सक्ने आशङ्का गरिएको छ। क्यानले मौसमको अवस्थालाई नजिकबाट नियालिरहेको र सोही अनुसार निर्णय लिने जनाएको छ।

मौसममा सुधार नआएका कारण दर्शकसहित खेलप्रेमीहरू निराश बनेका छन् भने प्रतियोगिताको खेल तालिका समेत प्रभावित हुन पुगेको छ। आयोजकहरूले मैदानको अवस्था र मौसम पूर्वानुमानलाई मध्यनजर गर्दै आगामी खेलहरूको व्यवस्थापन गर्ने तयारी गरिरहेका छन्।