टिकटकद्वारा कन्टेन्ट मोडरेसनमा एआईको व्यापक प्रयोग : पछिल्लो तीन महिनामा हटाइएका १८ करोडभन्दा बढी भिडियोमध्ये ९७ प्रतिशत अटोमेटेड

काठमाडौँ, कात्तिक १३ गते । टिकटकले कन्टेन्ट मोडरेसन (सामग्री नियमन) का लागि आर्टिफिसियल इन्टेलिजेन्स (एआई) र अटोमेटेड डिटेक्सन टेक्नोलोजीको व्यापक प्रयोग गर्दै आएको एक विज्ञप्तिमार्फत जानकारी दिएको छ।

टिकटकले सार्वजनिक गरेको पछिल्लो त्रैमासिक (अप्रिलदेखि जुन) को प्रतिवेदन अनुसार यस अवधिमा कम्युनिटी गाइडलाइन्स उल्लङ्घन गर्ने विश्वभरका १८ करोड ८२ लाख ९८ हजार १ सय ४१ वटा भिडियोहरू हटाइएका छन्। तीमध्ये ९७ प्रतिशत अर्थात् १८ करोड ३३ लाख ४४ हजार ७०७ वटा भिडियो स्वचालित प्रणाली (अटोमेटेड डिटेक्सन टेक्नोलोजी) को प्रयोग गरेर हटाइएको कम्पनीले जनाएको छ। यो टिकटकमा कुल अपलोड गरिएका कन्टेन्टको करिब ०.५ प्रतिशत हुन आउँछ।

यसै अवधिमा टिकटकले नेपालभित्र कम्युनिटी गाइडलाइन्स उल्लङ्घन गरेका २० लाख ३६ हजार १९१ वटा भिडियोहरू हटाएको छ, जुन नेपालमा प्रकाशित कुल भिडियोको ०.४ प्रतिशत मात्रै हो। नेपालमा हटाइएका सामग्रीमध्ये ९९.५ प्रतिशत भिडियोहरू प्रयोगकर्ताले रिपोर्ट गर्नुअघि नै टिकटकको प्रोएक्टिभ प्रणालीले स्वतः पहिचान गरेको थियो। तीमध्ये ९२.३ प्रतिशत भिडियो २४ घण्टाभित्रै हटाइएका थिए भने समीक्षापश्चात गलत ठहरिएका ३३ हजार ५०३ वटा भिडियोहरू पुनःस्थापना (बहाल) गरिएका थिए। विश्वव्यापी रूपमा पनि प्रयोगकर्ताको उजुरीअघि नै सामग्री हटाउने दर ९९.५ प्रतिशत रहेको र ६२ लाखभन्दा बढी भिडियोहरू समीक्षापछि फिर्ता गरिएको छ।

कन्टेन्ट मोडरेसनका साथै टिकटकले यस अवधिमा १४ करोड ६८ लाखभन्दा बढी नक्कली खाताहरू र १३ वर्षभन्दा कम उमेरका बालबालिकाको भएको आशङ्कामा २ करोड ६८ लाखभन्दा बढी खाताहरू प्रतिबन्ध लगाएको छ। त्यस्तै, नियमविपरीत रहेका २७ करोड ८३ लाखभन्दा बढी कमेन्टहरू पनि रिमुभ गरिएका छन्। लाइभ फिचरतर्फ पनि निगरानी कडा पारिएको छ जसमा प्रकाशित सामग्रीमध्ये २.४ प्रतिशत लाइभ कन्टेन्ट निलम्बन गरिएको छ भने नियम उल्लङ्घन गर्ने ७६ करोडभन्दा बढी लाइभ सेसन र २ करोड ६७ लाखभन्दा बढी लाइभ क्रिएटरहरूलाई चेतावनी दिइएको वा आम्दानीको सुविधाबाट वञ्चित गरिएको छ।

क्रिएटर र आम प्रयोगकर्ताका लागि सुरक्षित तथा सकारात्मक वातावरण कायम राख्न टिकटकले उन्नत मोडरेसन प्रविधि र मानवीय सुरक्षा विज्ञहरूको संयुक्त प्रयासमा लगानी गर्दै आएको छ। प्लेटफर्ममा सामग्री पोस्ट हुनुअघि नै स्वचालित प्रविधिले समीक्षा गर्ने हुनाले नीति उल्लंघन गर्ने सामग्रीहरू प्रयोगकर्तामाझ पुग्नबाट रोक्न यसले ठूलो सहयोग पुर्‍याएको छ। सन् २०२६ को दोस्रो त्रैमासिकको यो रिपोर्टले ठूलो परिमाणमा नियम उल्लंघन गर्ने सामग्री नियन्त्रण गर्न एआई प्रविधिको भूमिका प्रभावकारी बन्दै गएको स्पष्ट पारेको छ।