नेपाल टेलिकमद्वारा अति सस्तो ‘एफटिटिएच इन्टरनेट प्याकेज’ सार्वजनिक: वर्षको ४,९९९ रुपियाँमै ३० एमबिपिएस इन्टरनेट

काठमाडौँ, असोज ३० गते । सरकारी लगानीको नेपाल दूरसञ्चार कम्पनी लिमिटेड (नेपाल टेलिकम) ले बजारको तुलनामा अत्यन्त सुलभ तथा सस्तो मूल्यमा फाइबर टु दी होम (एफटिटिएच) इन्टरनेट प्याकेज घोषणा गरेको छ।

‘एनटी फाइबर’ नाम दिइएको यस योजना अन्तर्गत ग्राहकहरूले अब ३० एमबिपिएस क्षमताको इन्टरनेट वार्षिक मात्र चार हजार ९९९ रुपियाँमा अर्थात् मासिक रूपमा मात्र ४१७ रुपियाँमा जडान गर्न सक्नेछन्।

टेलिकमले ३० एमबिपिएस प्याकेजबाहेक निःशुल्क जडान सुविधासहित १००, १५० र २०० एमबिपिएसका प्याकेजहरू पनि बजार मूल्यभन्दा सस्तो दरमा उपलब्ध गराउँदै आएको छ।

यसका साथै, यस प्याकेजमा दैनिक १ जीबी मोबाइल डेटा प्रयोग गर्न सकिने सुविधासमेत थप गरिएको छ। कम्पनीका प्रबन्ध निर्देशक सङ्गीता पहाडी (अर्याल) र प्रवक्ता डा. कमल लामिछानेका अनुसार प्रधानमन्त्री वालेन्द्र शाहले यस प्याकेजबारे सामाजिक सञ्जालमा पोस्ट गरेसँगै देशभरिबाट ग्राहकहरूको भारी चासो र माग बढेको छ।

हाल ७७ वटै जिल्लाका ४०० भन्दा बढी स्थानीय तहका केन्द्र र मुख्य बस्तीहरूमा उपलब्ध यो सेवा विशेष गरी विद्यार्थी र मध्यमवर्गीय परिवारका लागि निकै उपयोगी साबित हुनेछ। बढेको मागलाई मध्यनजर गर्दै टेलिकमले विदाका दिनसमेत मर्मतसम्भार र जडान सेवा सुचारु राख्न विशेष प्रबन्ध मिलाएको छ।

‘पोर्ट’ नपुगेका क्षेत्रमा थप पोर्ट विस्तार गर्ने, प्रतीक्षा सूचीमा रहेका ग्राहकलाई प्राथमिकता दिने तथा टेलिकमको कार्यालय नरहेका स्थानमा पनि अस्थायी व्यवस्थापन मार्फत प्राविधिक टोली खटाउने तयारी गरिएको कम्पनीले जनाएको छ।

यसैगरी, भौतिक सेट–टप बक्सको आवश्यकता नपर्ने आधुनिक ‘एनटिटिभी’ सेवामा समेत ग्राहकको रुचिअनुसारका कन्टेन्ट बन्डलिङ गरेर सेवालाई थप परिष्कृत गर्ने योजना टेलिकमको रहेको छ।