वार्षिक ५ लाख मेट्रिक टन क्षमताको ‘ग्रीन युरिया प्लान्ट’ स्थापनाका लागि प्रस्ताव आह्वान

काठमाडौँ, असोज २९ गते । कृषि, वन तथा पर्यावरण मन्त्री गीता चौधरीको अग्रसरतामा मन्त्रालयले वार्षिक करिब ५ लाख मेट्रिक टन क्षमताको ग्रीन युरिया प्लान्ट (हरित युरिया उद्योग) स्थापनाका लागि अवधारणा, विस्तृत विवरण तथा कार्यान्वयनको ढाँचासम्बन्धी प्रस्ताव आह्वान गरेको छ।

सरकारको मुख्य लक्ष्य मुलुकमा वार्षिक करिब ५ लाख मेट्रिक टन क्षमताको प्लान्ट स्थापना गर्नु रहेको र भविष्यमा आवश्यकता अनुसार यसको उत्पादन क्षमता थप विस्तार गर्न सकिने मन्त्री चौधरीले बताउनुभएको छ।

व्यावसायिक रूपमा हरित युरिया उत्पादन गर्ने उद्योग स्थापना गर्न इच्छुक कम्पनी, संयुक्त लगानी (ज्वाइन्ट भेन्चर) तथा कन्सोर्टियमसँग अवधारणा र कार्यविधिसम्बन्धी विस्तृत प्रस्ताव माग गरिएको छ। प्राप्त प्रस्तावहरूको मूल्याङ्कनबाट उपयुक्त प्रविधि, लगानीको ढाँचा, प्राविधिक चुनौती, आर्थिक सम्भाव्यता र आवश्यक पर्ने सरकारी सहुलियतहरूबारे स्पष्टता प्राप्त हुने मन्त्रालयले जनाएको छ।

इच्छुक कम्पनी तथा लगानीकर्ताहरूले मन्त्रालयको आधिकारिक वेबसाइट www.moafe.gov.np मार्फत अवधारणा तथा कार्यविधिसम्बन्धी विस्तृत विवरण प्राप्त गर्न सक्नेछन्। आवेदकहरूले आफ्नो प्रस्ताव आगामी मङ्सिर १३ गते साँझ ५ बजेसम्म मन्त्रालयमा भौतिक रूपमा बुझाउन वा greenurea@moafe.gov.np मा इमेलमार्फत पठाउन सक्नेछन्।