प्रभासको अस्थिर करिअर र ‘द राजासाब’ को असफलतापछि आगामी फिल्म ‘स्पिरिट’ को रिलिज मिति सर्ने निश्चित

काठमाडौँ, असोज २९ गते । अभिनेता प्रभासको करिब २५ वर्षको करिअरमा २५ वटै फिल्म प्रदर्शनमा आएका छन्। सन् २०१५ को फिल्म ‘बाहुबली : द बिगिनिङ’ पछि उनको लोकप्रियता दक्षिण भारतीय सिमा नाघेर विश्वव्यापी बन्न पुग्यो। तर, ‘बाहुबली’ बाट चुलिएको उनको स्टारडम त्यसपछि भने निकै अस्थिर देखियो।

‘बाहुबली’ पछि आएका ‘साहो’ (२०१९), ‘राधे श्याम’ (२०२२) र ‘आदिपुरुष’ (२०२३) ले अपेक्षकृत कमाइ गर्न सकेनन् भने समीक्षात्मक रूपमा पनि कमजोर साबित भए। यद्यपि, ‘सलार–१’ र ‘कल्की २८९८ एडी’ को सफलताले उनलाई ठूलै राहत दियो।

यिनै उतारचढावका बीच यसै वर्षको जनवरीमा रिलिज भएको ५ सय करोड भारुसम्मको बिग बजेट फिल्म ‘द राजासाब’ ले भने नराम्ररी असफलता व्योहोर्न पुग्यो। फिल्मले लगानीको आधा हिस्सा (२१० करोड भारु) पनि उठाउन नसक्दा निर्माता टीजी विश्वप्रसादले ठूलो नोक्सानी र निराशा सहनुपरेको मिडियासामू बताएका छन्।

‘द राजासाब’ को यसै असफलताको असर यतिबेला प्रभासको आगामी बहुप्रतिक्षित फिल्म ‘स्पिरिट’ माथि पनि परेको देखिन्छ। सन्दीप रेड्डी वाङ्गाको निर्देशनमा बन्ने भनिएको र प्रभास प्रहरी अधिकारीको भूमिकामा रहने भनिएको यस फिल्मको रिलिज मिति परिवर्तन हुने लगभग निश्चित भएको छ।

प्रभासको अस्थिर करिअर, पछिल्लो फिल्मको असफलता र आगामी वर्षको ईदलाई लक्षित गरी १० मार्चमा रिलिज हुने सलमान खान स्टारर ‘मोन्स्टर’ सँगको ठूलो भिडन्तबाट हुने घाटालाई ध्यानमा राख्दै निर्माताले साबिकको मितिमा फिल्म रिलिज नगर्ने निर्णय गरेका हुन्।