बञ्चरेडाँडामा फोहोर व्यवस्थापन प्रभावित हुने: कात्तिक १ देखि ४ गतेसम्म घरमै फोहोर वर्गीकरण गरी सुरक्षित राख्न महानगरको आग्रह

काठमाडौँ, असोज ३० गते । काठमाडौँ महानगरपालिकाले आगामी कात्तिक १ गतेदेखि ४ गतेसम्म उपत्यकाको अन्तिम फोहोर व्यवस्थापनस्थल बञ्चरेडाँडामा फोहोर व्यवस्थापन कार्य प्रभावित हुने जानकारी गराएको छ।

बडा दसैँको मुख्य दिनहरू परेका कारण महानगरका सरसफाइ तथा सफाइ कर्मचारीहरू पनि पर्व मनाउन घर जाने हुँदा सो अवधिभर नियमित रूपमा फोहोर उठ्ने कार्य प्रभावित हुने महानगरले जनाएको छ।

फोहोर व्यवस्थापन नहुने उक्त चार दिनको अवधिमा घर, कार्यालय तथा विभिन्न व्यावसायिक प्रतिष्ठानहरूबाट उत्पादन हुने फोहोरलाई कुहिने र नकुहिने गरी छुट्टाछुट्टै वर्गमा वर्गीकरण गरी सुरक्षित रूपमा राख्न वातावरण व्यवस्थापन विभागका प्रमुख सरिता राईले सबै नगरवासीलाई विशेष अनुरोध गर्नुभएको छ।

जथाभावी फोहोर सडक तथा सार्वजनिक स्थानहरूमा नभई आफ्नै घर वा कम्पाउन्डभित्रै व्यवस्थापन गर्न महानगरले आग्रह गरेको छ। तोकिएको चार दिनको अवधिबाहेक अन्य दिनहरूमा भने नियमित रूपमा फोहोर संकलन तथा व्यवस्थापन कार्य सुचारु हुनेछ।