शिक्षा मन्त्रालयको महत्वाकांक्षी योजना: २ हजारभन्दा बढी विद्यार्थी भएका १०९ सामुदायिक विद्यालयको पूर्वाधार विकास गरिने, छानिए ८९ विद्यालय

काठमाडौँ, असोज २९ गते । शिक्षा तथा खेलकुद मन्त्रालयले दुई हजारभन्दा बढी विद्यार्थी अध्ययनरत देशभरका १०९ वटा सामुदायिक विद्यालयलाई प्राथमिकतामा राखेर भौतिक पूर्वाधार विस्तारको महत्वाकांक्षी योजना कार्यान्वयनमा ल्याएको छ। दुई हजारभन्दा धेरै विद्यार्थी भएका यी विद्यालयहरूको भौतिक संरचना सुदृढीकरणका लागि कुल ६ अर्ब ५४ करोड रुपियाँ बजेट विनियोजन गरिएको छ।

यस योजनाअन्तर्गत पहिलो चरणमा ८९ वटा विद्यालयको पहिचान गरी ५ अर्ब ३४ करोड रुपियाँ निकासा भइसकेको छ। प्रतिविद्यालय करिब ६ करोड रुपियाँको लागतमा आधुनिक १२ कोठे तीन तले भवन, अत्याधुनिक प्रयोगशाला र समृद्ध पुस्तकालय निर्माण गर्नेगरी काम तीव्र पारिएको शिक्षा तथा खेलकुदमन्त्री सस्मित पोखरेलले जानकारी दिनुभएको छ।

पहिलो चरणमा निकासा भएका ८९ विद्यालयमध्ये ३७ प्रतिशतभन्दा बढी अर्थात् ३३ वटा विद्यालय मधेश प्रदेशका परेका छन्। मधेश प्रदेशको साक्षरता दर, शैक्षिक सूचकांक र सरकारी विद्यालयको गुणस्तर सुधारमा उच्च प्राथमिकता दिँदै बजेट विनियोजन गरिएको मन्त्रालयले जनाएको छ। मधेशपछि लुम्बिनी प्रदेशका २१ र कोशी प्रदेशका १८ वटा विद्यालय यस पूर्वाधार विकास योजनामा छनोट भएका छन्। त्यस्तै, सुदूरपश्चिम र गण्डकीमा ६/६, कर्णालीमा ३ र बागमती प्रदेशबाट २ वटा विद्यालय यस सूचीमा समेटिएका छन्।

 
प्रदेशगत रूपमा छनोट भएका विद्यालयहरूको सूची