दसैँको टीका नजिकिँदै जाँदा उपत्यकाबाट बाहिरिने यात्रुको चाप तीव्र: घटस्थापनादेखि ३ लाख बाहिरिए

काठमाडौँ, असोज ३० गते । दसैँको टीका नजिकिएसँगै काठमाडौँ उपत्यकाबाट आफ्ना गृहजिल्लातर्फ जाने यात्रुको चाप अत्यधिक रूपमा बढेको छ। काठमाडौँ उपत्यका ट्राफिक प्रहरी कार्यालयका अनुसार घटस्थापनादेखि बिहीबारसम्म मात्र करिब तीन लाख यात्रु दसैँ मनाउन उपत्यकाबाट बाहिरिइसकेका छन्।

अध्ययन, रोजगारी तथा विभिन्न पेसा–व्यवसायका कारण काठमाडौँमा बसोबास गर्दै आएका नागरिकहरू दसैँका लागि गाउँ फर्किने क्रम बढेसँगै नयाँ बसपार्क लगायत उपत्यकाका विभिन्न नाकाहरूमा चहलपहल ह्वात्तै बढेको छ।

नयाँ बसपार्क सञ्चालन तथा व्यवस्थापन गर्दै आएको लोत्से बहुउद्देश्यीय प्रा.लि.का महाप्रबन्धक पङ्कज मल्लका अनुसार सामान्य समयमा दैनिक करिब दुई सय सार्वजनिक बस बाहिरिने गरेकामा दसैँ सुरु भएपछि यो सङ्ख्या दैनिक ४५० पुगेको छ। त्यस्तै, गोङ्गबु बसपार्कबाट मात्र दैनिक २५० माइक्रोबस बाहिरिएका छन्, जुन सामान्य दिनको तुलनामा दोब्बर हो।

नागढुङ्गा, जगाती, माछापोखरी र बल्खुलगायतका नाकाहरूमा सवारीसाधनको अत्यधिक चाप देखिएको ट्राफिक प्रहरीले जनाएको छ। नेपाल यातायात व्यवसायी राष्ट्रिय महासङ्घले सुरक्षित यात्राका लागि आधिकारिक काउन्टरबाट मात्रै टिकट काटेर यात्रा गर्न सर्वसाधारणलाई आग्रह गरेको छ।

तर, बर्सातका कारण भत्किएका राजमार्ग र बाटामा हुने ट्राफिक जामका कारण सवारीसाधन समयमै गन्तव्यमा पुग्न नसक्दा अग्रिम टिकट काटिएका बसहरू समयमै व्यवस्थापन गर्न केही कठिनाइ भइरहेको महासङ्घका महासचिव डेकनाथ गौतमले बताएका छन्।