नेपाली कांग्रेसको १५औँ महाधिवेशन : नवनिर्वाचित पदाधिकारी तथा सदस्यहरूको शपथ ग्रहण आज

काठमाडौँ, कात्तिक १२ गते । नेपाली कांग्रेसको १५औँ महाधिवेशनबाट नवनिर्वाचित भएका पदाधिकारी तथा सदस्यहरूको शपथ ग्रहण कार्यक्रम आज दिउँसो २ बजे ललितपुरको सानेपास्थित पार्टी केन्द्रीय कार्यालयमा आयोजना हुने भएको छ।

केन्द्रीय निर्वाचन समितिका अनुसार यस शपथ ग्रहण समारोहमा पार्टी सभापतिबाहेक बाँकी सम्पूर्ण पदाधिकारी तथा केन्द्रीय सदस्यहरूले पद तथा गोपनीयताको शपथ लिनेछन्। नवनिर्वाचित सभापति गगनकुमार थापाले भने बडादसैँको फूलपातीको दिन अर्थात् गत असोज ३१ गते नै पद तथा गोपनीयताको शपथ ग्रहण गरिसक्नुभएको छ।

केन्द्रीय निर्वाचन समितिका सदस्य सचिव अधिवक्ता राजु कटुवालले दिएको जानकारीअनुसार यसपटकको शपथ ग्रहण कार्यक्रम विगतभन्दा पूर्ण रूपमा फरक ढाँचामा सम्पन्न गरिनेछ। नवनिर्वाचित नेताहरूलाई शपथ ग्रहण गराउनुका साथै कार्यक्रममै प्रमाणपत्र वितरण गरिने र आजै औपचारिक रूपमा पदबहालीसमेत गराइने कार्यक्रम तय गरिएको छ। महाधिवेशनका क्रममा देखिएको उत्साह र नयाँ नेतृत्वप्रतिको अपेक्षालाई यस शपथ ग्रहण कार्यक्रमले थप उर्जा प्रदान गर्ने विश्वास लिइएको छ।

गत असोज १८ देखि २३ गतेसम्म काठमाडौँमा सम्पन्न कांग्रेसको १५औँ महाधिवेशनअन्तर्गत खुलामञ्चमा उद्घाटन तथा बन्दसत्र सञ्चालन गरिएको थियो भने मतदान खुलामञ्च र राष्ट्रिय सभागृहमा सम्पन्न भएको थियो। महाधिवेशनको मतदान असोज २३ गते भएर सोही रातिदेखि राष्ट्रिय सभागृहमा सभापतिको मतगणना सुरु भई २४ गते बिहानै परिणाम आएको थियो। त्यसपछिका अन्य पदहरूको मतगणना प्रक्रिया पूरा गरी निर्वाचनको अन्तिम नतिजा गत असोज ३० गते औपचारिक रूपमा सार्वजनिक गरिएको थियो।

नयाँ नेतृत्वको चयनसँगै कांग्रेस पार्टीभित्र नयाँ ऊर्जा र गतिशीलतातर्फ अघि बढ्ने अपेक्षा गरिएको छ। आज हुने शपथ ग्रहण र पदबहाली कार्यक्रमसँगै १५औँ महाधिवेशनबाट निर्वाचित कार्यसमिति औपचारिक रूपमा पूर्ण जिम्मेवारीमा खटिनेछ, जसले आगामी दिनमा पार्टीका नीति, योजना र सांगठनिक सुदृढीकरणका कामहरूलाई थप तीव्र गति दिनेछ।