पक्राउ परेका सबै पत्रकार रिहा भए : सरकार प्रेस स्वतन्त्रताप्रति पूर्ण प्रतिबद्ध रहेको सञ्चारमन्त्री तिमिल्सिनाको भनाइ

काठमाडौं, कात्तिक १३ गते । सूचना तथा सञ्चारमन्त्री डा. विक्रम तिमिल्सिनाले विभिन्न सञ्चारमाध्यमका समाचार कक्षबाट प्रहरीद्वारा नियन्त्रणमा लिइएका सबै पत्रकारहरू सकुशल रिहा भएको जानकारी दिनुभएको छ।

सामाजिक सञ्जालमार्फत पत्रकारहरू छुटेको औपचारिक जानकारी गराउँदै मन्त्री तिमिल्सिनाले वर्तमान सरकार प्रेस स्वतन्त्रता र व्यावसायिक पत्रकारिताप्रति पूर्ण रूपमा प्रतिबद्ध रहेको दोहोर्‍याउनुभएको छ। “प्रेस स्वतन्त्रता र जिम्मेवार पत्रकारिता लोकतन्त्रका आधारस्तम्भ हुन्,” उहाँले सामाजिक सञ्जालमा उल्लेख गर्नुभएको छ।

यसअघि, सादा पोशाकका प्रहरीले कार्यालय समय सकिएपछि विभिन्न सञ्चारमाध्यमका समाचार कक्षमै प्रवेश गरी पत्रकारहरू विश्वमणि सुवेदी र शोभराज बराल लगायतलाई नियन्त्रणमा लिएका थिए। पक्राउ पुर्जी र स्पष्ट कानुनी आधारबिना बिदाको समय पार् गरी गरिएको उक्त गिरफ्तारीको प्रेस काउन्सिल नेपाल लगायत विभिन्न पत्रकार महासंघ तथा संघ–संस्थाहरूले कडा शब्दमा विरोध गर्दै तत्काल रिहाइको माग गरेका थिए। पत्रकारहरूमाथिको यस किसिमको हस्तक्षेपले प्रेस स्वतन्त्रतामाथि गम्भीर आँच पुगेको भन्दै चौतर्फी आलोचना भएको थियो।

पत्रकारहरूको रिहाइपछि सरकारको तर्फबाट आएको यो प्रतिक्रियाले केही हदसम्म तनाव कम गर्ने अपेक्षा गरिएको छ। लोकतन्त्रमा प्रेसको गरिमा र पत्रकारको सुरक्षामा सरकार गम्भीर हुनुपर्ने सरोकारवालाहरूको जोड रहँदै आएको छ। समाचारको विषयलाई लिएर सिधै समाचार कक्षबाटै पत्रकारहरूलाई पक्राउ गर्ने प्रवृत्तिले उत्पन्न गरेको बहसबीच मन्त्री तिमिल्सिनाको यो भनाइ आएको हो।

सरकारले प्रेस स्वतन्त्रतालाई सधैँ उच्च सम्मान गर्ने र आगामी दिनमा यस्ता घटना दोहोरिन नदिन प्रशासनिक संयन्त्रलाई समेत सचेत गराउने विश्वास लिइएको छ। पत्रकारहरू रिहा भएपछि सञ्चार जगतमा देखिएको अन्योल र तनावको वातावरण केही सहज बनेको छ।