वैदेशिक रोजगारीमा पठाउने बाहानामा ७० लाख ठगी गर्ने दुई जना पक्राउ : कम्बोडिया र क्यानडा पठाइदिने भन्दै असुली

काठमाडौँ, कात्तिक १५ गते । वैदेशिक रोजगारीका लागि आकर्षक देशहरूमा पठाइदिने प्रलोभन देखाएर लाखौँ रकम ठगी गरेको आरोपमा प्रहरीले दुई जनालाई पक्राउ गरेको छ।

पीडितहरूको उजुरीका आधारमा काठमाडौँ उपत्यका अपराध अनुसन्धान कार्यालयबाट खटिएको प्रहरी टोलीले उनीहरूलाई नियन्त्रणमा लिएको हो। पक्राउ पर्नेमा दोलखाको मेलुङ गाउँपालिका–६ का २५ वर्षीय नोर्गेन मोक्तान र काभ्रेपलाञ्चोकको चौँरीदेउराली गाउँपालिका–९ की २४ वर्षीया सुस्मिता रसाइली रहेका छन्।

प्रहरीको प्रारम्भिक अनुसन्धान अनुसार पक्राउ परेका मोक्तानले कम्बोडिया पठाइदिने भन्दै विभिन्न व्यक्तिबाट करिब रु ४० लाख ठगी गरेका थिए भने रसाइलीले क्यानडा पठाइदिने भन्दै रु ३० लाख उठाएकी थिइन्। पीडितहरूसँग मोटो रकम लिइसकेपछि उनीहरू सम्पर्कविहीन बनेका थिए। आफूहरू ठगिएको महसुस गरेपछि पीडितहरूले काठमाडौँ उपत्यका अपराध अनुसन्धान कार्यालयमा उजुरी दिएका थिए।

सोही उजुरी र प्राप्त प्रमाणका आधारमा दुवै जनालाई पक्राउ गरिएको कार्यालयका प्रहरी उपरीक्षक शरतकुमार थापाक्षेत्रीले जानकारी दिनुभएको छ। बैदेशिक रोजगारीको नाममा हुने यस्ता ठगीजन्य गतिविधिहरूले सर्वसाधारणलाई आर्थिक तथा मानसिक रूपमा ठुलो क्षति पुर्‍याउँदै आएको छ। पछिल्लो समय प्रलोभनमा पारेर रकम असुल्ने गिरोहहरू सक्रिय रहेको भन्दै प्रहरीले सचेत रहन समेत अनुरोध गरेको छ।

पक्राउ परेका दुवै जनाविरुद्ध आवश्यक अनुसन्धान तथा कानुनी कारबाही अगाडि बढाउने कार्य भइरहेको प्रहरीले जनाएको छ। वैदेशिक रोजगारीमा जानुपूर्व सम्बन्धित संस्था वा व्यक्तिको आधिकारिकता राम्ररी बुझ्न र अनाधिकृत व्यक्तिलाई रकम नबुझाउन प्रहरीले सर्वसाधारणलाई आग्रह गरेको छ।