गोरखाको समग्र विकास र समस्या समाधानका लागि परिणाममुखी काम गर्ने गृहमन्त्री गुरुङको प्रतिबद्धता

गोरखा, कात्तिक १५ गते । गृहमन्त्री सुधन गुरुङले गोरखाको समग्र विकास र जिल्लावासीका समस्या समाधानका लागि भाषणमा भन्दा पनि परिणाममुखी काम गरेर देखाउने प्रतिबद्धता व्यक्त गर्नुभएको छ।

गोरखाका बुद्धिजीवी, उद्योगी तथा व्यवसायीहरूसँग भएको अन्तरक्रिया कार्यक्रममा बोल्दै उहाँले नागरिकका अपेक्षा र जिल्लाका समस्यालाई गम्भीरतापूर्वक लिएको बताउनुभयो। आफू सरकारमा पुगेको छ महिना मात्रै भएको उल्लेख गर्दै गृहमन्त्री गुरुङले गोरखाका जनताले नै आफूलाई यो जिम्मेवारी सुम्पेको स्मरण गर्दै जिल्लाको हितका लागि सक्दो प्रयास गर्ने दृढता व्यक्त गर्नुभयो।

कार्यक्रममा सहभागी उद्योगी, व्यवसायी तथा बुद्धिजीवीहरूले गोरखाको पूर्वाधार विकास, कृषि उपजको बजारीकरण, पर्यटन प्रवर्द्धन र उद्योग–व्यवसाय सञ्चालनमा देखिएका जटिलताहरूबारे गृहमन्त्रीको गम्भीर ध्यानाकर्षण गराएका थिए। जिल्लामा प्रचुर पर्यटकीय सम्भावना रहे पनि त्यसको प्रभावकारी उपयोग हुन नसकेको गुनासो गर्दै उनीहरूले सडक, पुलजस्ता भौतिक पूर्वाधार निर्माणलाई द्रुत गति दिनुपर्ने माग राखे।

त्यस्तै, किसानले उत्पादन गरेका कृषि वस्तुले उचित बजार र मूल्य नपाएको तथा लगानीमैत्री वातावरणको अभाव रहेको विषय पनि जोडका साथ उठाइएको थियो।

अन्तरक्रियाका क्रममा सहभागीहरूले केही साताअघि बुढीगण्डकी नदीमा आएको बाढीले बगाएको पुलको पुनर्निर्माण कार्य तत्काल अगाडि बढाइएकोमा गृहमन्त्री गुरुङप्रति विशेष धन्यवाद ज्ञापन गरेका थिए। बाढीका कारण अवरुद्ध बनेको आवागमनलाई सहज बनाउन चालिएको कदमप्रति स्थानीयवासीले सकारात्मक प्रतिक्रिया जनाएका छन्। गोरखावासीले अब आश्वासनभन्दा पनि ठोस परिणाम दिने नेतृत्व खोजेको उनीहरूको भनाइ थियो।

स्थानिय स्तरमा रोजगारी सिर्जना र आर्थिक गतिविधि विस्तार गर्न जिल्लाका सम्भावित क्षेत्रहरूको समुचित सदुपयोग गर्नुपर्नेमा सहभागीहरूले जोड दिएका छन्। गृहमन्त्री गुरुङले पनि जनताका मागहरूलाई सम्बोधन गर्दै विकास निर्माणका कामलाई प्राथमिकताका साथ अघि बढाउने विश्वास दिलाउनुभएको छ।