बङ्गालको खाडीमा शक्तिशाली चक्रवात ‘मुरासु’ विकसित : भारतको आन्ध्र प्रदेश र तमिलनाडुमा सतर्कता

काठमाडौँ, कात्तिक १५ गते । बङ्गालको खाडीमा अर्को शक्तिशाली चक्रवात विकसित हुने सम्भावना तीव्र रूपमा बढेको छ। भारतीय मौसम विज्ञान विभागका अनुसार दक्षिणपूर्वी बङ्गालको खाडीमा बनेको न्यूनचापीय प्रणाली पश्चिम–उत्तरपश्चिमतर्फ अघि बढ्दै चक्रवाती आँधीमा परिणत हुने क्रममा रहेको छ।

यो प्रणाली चेन्नईबाट करिब ८३० किलोमिटर पूर्व–दक्षिणपूर्व र विशाखापट्टनमबाट ८८० किलोमिटर दक्षिण–दक्षिणपूर्वमा केन्द्रित रहेको छ। आइतबार मध्याह्नसम्म गहिरो न्यूनचापीय प्रणाली बन्ने र मध्यरातसम्म चक्रवातको रूप लिने तथा सोमबारसम्म शक्तिशाली चक्रवाती आँधीमा परिणत हुने विभागको विश्लेषण छ।

मङ्गलबार बिहान दक्षिण आन्ध्र प्रदेशको तटनजिक आइपुग्ने अनुमान गरिएको यो चक्रवातले नेल्लोर तथा नरसापुरबीचको तटीय क्षेत्रमा प्रतिघण्टा १०० देखि ११० किलोमिटरको वेग तथा १२० किलोमिटरसम्मको हावाको झोक्कासहित तट पार गर्ने सम्भावना रहेको छ।

विभागका महानिर्देशक मृत्युन्जय महापात्रका अनुसार पूर्ण विकसित भएपछि यस चक्रवातको नाम ‘मुरासु’ राखिनेछ, जसमा तमिल भाषामा ‘मुरासु’ को अर्थ ड्रम अर्थात् नगरा वा ढोल हुन्छ। यस चक्रवातको प्रभावले तमिलनाडुका विभिन्न जिल्लाहरूमा भारीदेखि मध्यम वर्षा हुने पूर्वानुमान गरिएको छ भने राजधानी चेन्नईमा पनि आंशिक बदली र मेघगर्जनसहित वर्षाको सम्भावना छ।

यस शक्तिशाली मौसमी प्रणालीले छिमेकी देशहरूमा प्रभाव पार्ने देखिए पनि नेपालतर्फ भने यसको कुनै पनि असर पर्ने सम्भावना नरहेको मौसमविद्हरूले स्पष्ट पारेका छन्। मौसमविद् विनोद पोखरेलका अनुसार हालसम्मका सबै मौसम मोडेलहरूको विश्लेषण गर्दा यो प्रणाली नेपालतर्फ आउने वा यसको प्रभावले नेपालमा वर्षा गराउने कुनै सम्भावना नरहेको देखिएको छ।

यद्यपि, भारतका तटीय क्षेत्रहरूमा भने चक्रवातले पुर्‍याउन सक्ने सम्भावित क्षतिलाई मध्यनजर गर्दै सुरक्षा सतर्कता उच्च पारिएको छ। नोभेम्बर महिनामा भारतका अधिकांश क्षेत्रमा औसतभन्दा कम वर्षा र औसतभन्दा बढी तापक्रम रहने प्रक्षेपण गरिएको छ।