सुशासन र आर्थिक सुधारका लागि सरकारसँग सहकार्य गर्न कांग्रेस तयार छ : सभापति गगनकुमार थापा

काठमाडौँ, कात्तिक १५ गते । नेपाली कांग्रेसका सभापति गगनकुमार थापाले मुलुकमा सुशासन, विधिको शासन र आर्थिक सुधारलाई प्रभावकारी बनाउन सरकारसँग सहकार्य गर्न आफ्नो पार्टी तयार रहेको स्पष्ट पार्नुभएको छ।

पार्टी कार्यालय सानेपामा आइतबार विशेष सम्बोधन गर्दै उहाँले लोकतान्त्रिक व्यवस्थालाई बलियो बनाउन सरकारका सबै निकायले कानुनी प्रक्रिया र संस्थागत मर्यादाभित्र रहेर काम गर्नुपर्नेमा जोड दिनुभयो। प्रधानमन्त्री, मन्त्रीदेखि सुरक्षा निकायसम्म सबैले कानुनको पालना गर्दा मात्रै सुशासनको प्रत्याभूति हुने उहाँको भनाइ थियो।

सरकारले भ्रष्टाचार नियन्त्रण र सुशासनका लागि चाल्ने प्रयासहरूमा स्पष्ट कानुनी प्रक्रिया र निष्पक्ष कार्यान्वयन आवश्यक रहेको औँल्याउँदै सभापति थापाले कर्मचारीतन्त्र, सुरक्षा निकाय, न्यायपालिका र व्यावसायिक क्षेत्रले निर्भीक रूपमा काम गर्ने वातावरण बनाउनुपर्ने बताए। बिचौलियासँग जोडिएका प्रकरणमा प्रमाणका आधारमा निष्पक्ष अनुसन्धान गर्नुपर्ने माग गर्दै उहाँले विभिन्न छानबिन समितिका प्रतिवेदनहरू सार्वजनिक गर्न सरकारको ध्यानाकर्षण गराउनुभयो।

विशेषगरी गृहमन्त्रीको सम्पत्ति, भदौ २३ र २४ गतेका घटना तथा सुनसरीको कप्तानगञ्ज प्रकरणका प्रतिवेदन सार्वजनिक भए नागरिकमा सरकारप्रतिको विश्वास बढ्ने उहाँको धारणा थियो।

अर्थतन्त्रको वर्तमान अवस्थाबारे चर्चा गर्दै सभापति थापाले बैंकमा तरलता रहे पनि कर्जा विस्तार र लगानी बढ्न नसकेको तथा व्यवसायीहरूले कठिनाइ भोगिरहेको उल्लेख गर्नुभयो। देशलाई अहिले त्रास होइन, विश्वास र नीतिगत पूर्वानुमान गर्न सकिने वातावरण चाहिएको बताउँदै उहाँले आर्थिक गतिविधि बढाउन सरकारले विशेष पहल गर्नुपर्ने बताए। न्यायपालिकाको स्वतन्त्रता, सञ्चारमाध्यमको व्यावसायिकता र निजी क्षेत्रको मनोबल उच्च राख्न राज्यका संयन्त्रहरू जिम्मेवार बन्नुपर्नेमा उहाँले जोड दिनुभयो।

सरकारले सुशासन, आर्थिक सुधार र सेवा प्रवाहलाई प्राथमिकतामा राखेर काम गरेमा प्रतिपक्षका रूपमा कांग्रेसले रचनात्मक सहयोग गर्ने उहाँले प्रतिबद्धता व्यक्त गर्नुभयो। आर्थिक सुधारसम्बन्धी विधेयक पारित गर्न तथा संसद्लाई प्रभावकारी बनाउन आफ्नो पार्टी पूर्ण रूपमा तयार रहेको बताउँदै उहाँले साझा लक्ष्य प्राप्तिका लागि सरकार र प्रतिपक्षबीच सकारात्मक सहकार्य आवश्यक रहेको औँल्याउनुभयो।