विगतका गल्ती सच्याउँदै कम्युनिस्ट पार्टी फेरि शक्तिशाली बन्नेछन् : संयोजक प्रचण्ड

काठमाडौँ, कात्तिक १५ गते । नेपाली कम्युनिस्ट पार्टीका संयोजक एवं पूर्वप्रधानमन्त्री पुष्पकमल दाहाल ‘प्रचण्ड’ले देश अहिले अप्ठ्यारो परिस्थितिबाट गुज्रिरहेको र पछिल्ला केही गतिविधिले संविधान तथा लोकतन्त्रको रक्षामै चुनौती थपिएको बताउनुभएको छ।

आइतबार सर्लाही सदरमुकाम मलङ्गवामा आयोजित पार्टीको एकता बैठक तथा प्रशिक्षण कार्यक्रममा सम्बोधन गर्दै संयोजक दाहालले विगतका गल्तीहरूलाई सच्याउँदै जनतासँगको सम्बन्ध सुदृढ बनाउने प्रतिबद्धता व्यक्त गर्नुभयो। जनताका घरदैलो तथा टोलबस्तीमा पुगेर राष्ट्रिय जागरण अभियान सञ्चालन गरिने र यसबाट कम्युनिस्ट पार्टीहरू फेरि शक्तिशाली रूपमा उदाउने उहाँको दाबी थियो।

परिवर्तनको उद्गम भूमि, सहिदहरूको बलिदान र ठुलो राजनीतिक विरासत बोकेको मधेशमा नेकपाले विशेष ध्यान केन्द्रित गरेको उल्लेख गर्दै उहाँले राष्ट्रियता र स्वाधीनताको रक्षाका लागि अग्रभागमा रहेर साथ दिन मधेशवासीलाई आग्रह गर्नुभयो। देशब्यापी आन्दोलन र घरदैलो अभियानमार्फत नयाँ चेतना फैलाउन पार्टी पूर्ण तयारीका साथ जुटेको उहाँको भनाइ थियो।

देशभरका अन्य ७६ जिल्लामा एकता प्रक्रिया यसअघि नै सम्पन्न भइसकेको अवस्थामा सर्लाहीमा पनि आइतबार भव्य रूपमा एकता सभा सम्पन्न भएको स्थानीय नेता रामेश्वर रायले जानकारी दिनुभयो।

कार्यक्रममा पूर्वप्रधानमन्त्री एवं सहसंयोजक माधवकुमार नेपालले विगत ३५ वर्षको अवधिमा शिक्षा, साक्षरता, हुलाकी राजमार्ग, मध्यपहाडी लोकमार्ग, सडक तथा विद्युत् परियोजनाजस्ता क्षेत्रमा उल्लेख्य विकास भए पनि केही शक्तिहरूले पुराना राजनीतिक दललाई नकारात्मक रूपमा प्रस्तुत गर्ने असफल प्रयास गरिरहेको बताउनुभयो। उहाँले युरोपका केही देशको शैलीमा नेपालमा पनि कम्युनिस्ट पार्टीको झन्डा फहराउने दाबी गर्दै वर्तमान सरकारलाई रोजगारी सिर्जना, किसानका समस्या समाधान र उद्योगधन्दा सञ्चालनमा विशेष ध्यान दिन सुझाव दिनुभयो।

कार्यक्रमका दौरान सर्लाहीका विभिन्न राजनीतिक दलका नेता तथा कार्यकर्ताहरूले नेपाली कम्युनिस्ट पार्टीमा प्रवेश तथा एकता भएको घोषणा गरेका थिए। जिल्लाभरबाट सहभागी हजारौँ नेता तथा कार्यकर्तालाई पार्टीका शीर्ष नेताहरूले समसामयिक राजनीतिक विषयमा विशेष प्रशिक्षणसमेत प्रदान गरेका थिए।