सङ्घीयता, लोकतन्त्र र संविधानको रक्षाका लागि अग्रगामी मोर्चा गठन भएको छ : उपेन्द्र यादव

नेपालगन्ज, कात्तिक १५ गते । जनता समाजवादी पार्टीका केन्द्रीय अध्यक्ष तथा पूर्व उपप्रधानमन्त्री उपेन्द्र यादवले देशमा देखिएका गलत गतिविधिहरूले सङ्घीयता, लोकतन्त्र र संविधानलाई नै खतरामा पारेको बताउनुभएको छ।

अग्रगामी मोर्चाद्वारा आइतबार नेपालगन्जमा आयोजित लुम्बिनी प्रदेशस्तरीय कार्यकर्ता भेला तथा प्रशिक्षण कार्यक्रमलाई सम्बोधन गर्दै अध्यक्ष यादवले प्राप्त उपलब्धिको रक्षाका लागि अग्रगामी मोर्चा गठन गरिएको स्पष्ट पार्नुभयो। विगतका ठुला आन्दोलन र बलिदानबाट प्राप्त अधिकारहरू खोसिन थालेको महसुस भएपछि आफूहरू देश दौडाहामा निस्किएको उहाँको भनाइ थियो।

सोही कार्यक्रममा बोल्दै जनमत पार्टीका केन्द्रीय अध्यक्ष सिके राउतले जनताका चाहना र अधिकारहरू पूरा नहुने अवस्था सिर्जना भएकोले अब चुप लागेर बस्न नसकिने बताउनुभयो। जनताका अधिकारको पूर्ण सुनिश्चिताका लागि कडा सङ्घर्ष र आन्दोलन अपरिहार्य भएको उहाँको जोड थियो।

त्यसैगरी, प्रगतिशील लोकतान्त्रिक पार्टीका संरक्षक तथा पूर्वमन्त्री जनार्दन शर्माले देशको राजनीतिक गतिरोधले प्रणाली नै विघटन हुने खतरा औँल्याउँदै मुलुकलाई सही दिशा दिन राष्ट्रव्यापी जागरण अभियानको थालनी गरिएको जानकारी दिनुभयो।

आम जनता पार्टीका केन्द्रीय अध्यक्ष प्रभु शाहले पनि संविधान र जनताको अधिकारको रक्षाका लागि सम्पूर्ण जनता पुनः एकपटक जाग्नुपर्ने बेला आएको धारणा राख्नुभयो। लुम्बिनी प्रदेशका सयौँ नेता तथा कार्यकर्ताहरूको उल्लेख्य सहभागिता रहेको उक्त प्रशिक्षण कार्यक्रममा प्रदेशसभा सदस्य अम्बिका काफ्ले लगायत अन्य नेताहरूले समेत मन्तव्य राख्नुभएको थियो। जनता समाजवादी पार्टी नेपाल बाँकेका अध्यक्ष कौशल धोबीको सभापतित्वमा सम्पन्न सो कार्यक्रमले लुम्बिनी प्रदेशमा मोर्चालाई थप ऊर्जा प्रदान गर्ने विश्वास गरिएको छ।

देशभर सञ्चालन गरिएको यस जागरण अभियानले राजनीतिक दलहरूबीच नयाँ राजनीतिक समीकरण तथा मोर्चाबन्दीलाई समेत स्पष्ट पारेको छ। जनताका एजेन्डालाई मुख्य केन्द्रविन्दुमा राखेर अघि बढ्ने घोषणा गरेका शीर्ष नेताहरूको यस कदमले आगामी दिनको राजनीतिक दिशामा विशेष प्रभाव पार्ने देखिन्छ।