लोकतन्त्र र प्रेस स्वतन्त्रताविपरीतका गतिविधि कांग्रेसलाई स्वीकार्य छैन : गगनकुमार थापा

काठमाडौँ, कात्तिक १५ गते । नेपाली कांग्रेसका सभापति गगनकुमार थापाले लोकतान्त्रिक मूल्य, मान्यता र प्रेस स्वतन्त्रताविपरीत हुने कुनै पनि गतिविधि कांग्रेसलाई सैद्धान्तिक रूपमा स्वीकार्य नहुने स्पष्ट पार्नुभएको छ।

पार्टीको केन्द्रीय कार्यालयमा आयोजित ‘प्रतिपक्षको निगरानी कार्यक्रम’ लाई सम्बोधन गर्दै उहाँले लोकतन्त्र, नागरिकका मौलिक अधिकार र प्रेस स्वतन्त्रताको सम्मान गर्दै सुशासन कायम गर्नुपर्नेमा जोड दिनुभयो। सरकारलाई पूर्ण रूपमा जवाफदेही बनाउन तथा लोकतान्त्रिक व्यवस्थाका आधारभूत मान्यताहरूको संरक्षण गर्न कांग्रेसले सशक्त प्रतिपक्षको भूमिका निर्वाह गर्ने प्रतिबद्धता उहाँले व्यक्त गर्नुभयो।

सञ्चारमाध्यममा प्रहरी परिचालन गरी पत्रकार पक्राउ गरिएको घटनाप्रति गम्भीर आपत्ति जनाउँदै सभापति थापाले सञ्चारगृहभित्र प्रहरी प्रवेश गर्नु लोकतान्त्रिक अभ्यासमाथिको प्रहार भएको धारणा राख्नुभयो। यस घटनामा प्रहरी र प्रधानमन्त्रीको सचिवालयबाट आएका विरोधाभासी वक्तव्यहरूले थप अन्योल सिर्जना गरेको उल्लेख गर्दै उहाँले यसलाई सामान्य विज्ञप्ति निकालेर मात्रै टुङ्ग्याउन नहुने बताउनुभयो। घटनाको यथार्थ सत्य-तथ्य छानबिन गरी सार्वजनिक गर्न उहाँले सरकारसँग कडा माग गर्नुभयो।

राज्य सञ्चालनका क्रममा व्यक्तिगत इच्छा, चाहना र आदेशलाई कानुनभन्दा माथि राख्ने प्रवृत्ति लोकतन्त्रका लागि अत्यन्तै खतरनाक हुने उहाँको चेतावनी थियो। “सरकारको अधिकार कानुनबाट निर्देशित हुनुपर्छ, सरकारमा बसेका व्यक्तिको इच्छा नै कानुन हो भन्ने सोच लोकतन्त्रमा स्वीकार्य हुन सक्दैन,” उहाँले भन्नुभयो। कानुनी राज्यमा राज्यका सबै निकायहरू कुनै व्यक्तिको निजी आदेश पालना गर्ने साधन नभई संविधान र कानुनअनुसार सञ्चालन हुनुपर्नेमा उहाँले जोड दिनुभयो।

सरकारका हरेक गतिविधिहरू विधि, प्रक्रियासम्मत र संस्थागत मर्यादाभित्र रहनुपर्ने औँल्याउँदै सभापति थापाले शक्तिको स्वेच्छाचारी प्रयोग कुनै पनि हालतमा असहनशील हुने स्पष्ट पार्नुभयो। कानुनी शासनमा कोही पनि कानुनभन्दा माथि हुन नपाउने र नागरिक अधिकारको सम्मान राज्यको पहिलो दायित्व हुनुपर्ने कांग्रेसको प्रष्ट अडान रहेको उहाँले दोहोर्‍याउनुभयो।