एनपिएल : कर्णाली याक्समाथि काठमान्डु गोर्खाजको सनसनीपूर्ण जित

रशिद खान र कप्तान करण केसीको विस्फोटक ब्याटिङ मद्दतमा काठमान्डु गोर्खाजले नेपाल प्रिमियर लिग (एनपिएल) क्रिकेटमा पहिलो जित निकालेको छ।

सोमबार त्रिवि अन्तर्राष्ट्रिय क्रिकेट मैदान कीर्तिपुरमा सम्पन्न रोमाञ्चक खेलमा काठमान्डुले कर्णाली याक्समाथि ४ विकेटको सनसनीपूर्ण विजय हात पारेको हो। यसअघि पहिलो खेलमा पराजित भएको काठमान्डुले यस जितसँगै प्रतियोगितामा पुनरागमन गरेको छ भने लगातार दुई खेल जितेको कर्णालीले भने तेस्रो खेलमा पहिलो हार बेहोरेको छ।

कर्णालीले दिएको १ सय ८१ रनको लक्ष्य पछ्याउने क्रममा काठमान्डुका लागि रशिद खानले ३३ बलमा ३ चौका र २ छक्कासहित ५० रनको अर्धशतकीय इनिङ्स खेले। उनले आदिल आलम अन्सारीसँग तेस्रो विकेटका लागि ५४ र कप्तान करण केसीसँग पाँचौं विकेटका लागि ५५ रनको महत्त्वपूर्ण साझेदारी गरे।

त्यस्तै, १३औँ ओभरमा क्रिजमा आएका कप्तान करण केसीले मात्र २० बलमा ४ चौका र ३ छक्का प्रहार गर्दै आक्रामक ४४ रन बनाए। अन्त्यतिर जहाँन्दद खानले १० बलमा अविजित २२ रन जोड्दै टिमलाई सहज रूपमा लक्ष्यसम्म पुर्‍याए।

यसअघि टस हारेर पहिलो ब्याटिङको निम्तो पाउँदै कर्णाली याक्सले निर्धारित २० ओभरमा ६ विकेट गुमाउँदै १ सय ८० रनको योगफल तयार गरेको थियो। कर्णालीका लागि बंगलादेशी ओपनर आरिफुल इस्लामले ४४ र हुसैन तलातले ४० रन बनाएका थिए भने पवन सर्राफले ३० रन जोडेका थिए। काठमान्डुका लागि बलिङतर्फ कप्तान करण केसीले २ तथा जहाँन्दद खान, शाहव आलम, सन्तोष यादव र देव शाहले समान १–१ विकेट हात पारेका थिए।

अन्तिम ओभरहरूमा काठमान्डुले उत्कृष्ट प्रदर्शन गर्दै खेल आफ्नो पक्षमा पार्न सफल भयो। १९औँ ओभरमा लगातार छक्का र चौका प्रहार गर्दै जहाँन्दद र सन्तोषले टोलीलाई जित नजिक पुर्‍याएका थिए। यस रोमाञ्चक जितले काठमान्डुको टोली र समर्थकहरूमा नयाँ ऊर्जा थपेको छ।