मोबाइल र सामाजिक सञ्जालले नयाँ पुस्ताको चरित्र निर्माणमा नकारात्मक असर पार्‍यो : महासचिव शंकर पोखरेल

पाल्पा, कात्तिक १६ गते । नेकपा (एमाले) का महासचिव शंकर पोखरेलले नयाँ पुस्तामा सामाजिक तथा सांस्कृतिक मूल्य–मान्यताहरू दिनप्रतिदिन कमजोर हुँदै गएको बताउनुभएको छ।

संविधानसभा सदस्य एवं एमाले लुम्बिनी प्रदेश कमिटीका अध्यक्ष राधाकृष्ण कँडेलकी माता रेव कुमारी कँडेलको स्मृतिमा पाल्पाको रामपुर–३, रजघरामा आयोजित शोक सभालाई सम्बोधन गर्दै उहाँले आमाबाबुको संस्कारभन्दा मोबाइल र सामाजिक सञ्जालबाट बालबालिकाको चरित्र निर्माण हुन थालेकोमा गहिरो चिन्ता व्यक्त गर्नुभयो। बालबालिकालाई रोएका बेला मोबाइलमा भिडियो देखाएर फकाउने प्रवृत्तिले उनीहरूमा पारिवारिक संस्कार हस्तान्तरण रोकिँदै गएको उहाँको भनाइ थियो।

सूचना प्रविधिमा धेरै अगाडि रहेका विकसित देशहरूले समेत कम उमेरका बालबालिकालाई मोबाइल प्रयोगमा रोक लगाउने गरेको उल्लेख गर्दै महासचिव पोखरेलले हामी पनि सोसल मिडियाको अन्धसंसारतर्फ ढल्किँदै गएको बताउनुभयो। अग्रज पुस्ताले देश विकासका लागि गरेको त्याग, सङ्घर्ष र कठिनाइहरूलाई नयाँ पुस्ताले बिर्सिंदै गएको बताउँदै उहाँले गाउँघरमा बनेका बाटोघाटो, स्वास्थ्य संस्थाहरू आफैँ बनेका हुन् भन्ने गलत भाष्य निर्माण गरी नयाँ पुस्तालाई विद्रोही बनाउने प्रयास भइरहेको आरोप लगाउनु भयो।

राज्यका धरोहरहरूमा क्षति पुग्दा वा जल्दा खुसी हुने वा गर्व गर्ने पुस्ता तयार हुनु हाम्रो मौलिक संस्कार र संस्कृति नभएको उहाँले स्पष्ट पार्नुभयो। हाम्रो साँचो संस्कृति भगवान गौतम बुद्धले सिकाएको क्षमा र करुणाको संस्कृति भएको उल्लेख गर्दै पोखरेलले यातायात, सडक र स्वास्थ्य सुविधा नभएको प्रतिकूल समयमा पनि कष्टकर जीवन बिताएर सन्तान हुर्काएका आमाहरूको सङ्घर्षको सम्मान गर्नुपर्नेमा जोड दिनुभयो।

स्वर्गीय रेव कुमारी कँडेलको ८९ वर्षको उमेरमा गत कात्तिक ७ गते निधन भएको थियो। उक्त शोक सभामा एमालेका केन्द्रीय तहदेखि वडा स्तरसम्मका नेता तथा स्थानीय कार्यकर्ताहरूको बाक्लो उपस्थिति रहेको थियो।