सामुदायिक कुकुरको आतंक: बढ्दो जोखिमसँगै स्थानीयवासी त्रसित

नेपालगन्ज, असोज २७ गते । पछिल्लो समय नेपालगन्जका विभिन्न सडक, चोक तथा गल्लीहरूमा सामुदायिक कुकुरहरूको सङ्ख्या अत्यधिक रूपमा वृद्धि हुँदा स्थानीयवासीहरू त्रसित बनेका छन्। दिनभर सडकमा सुत्ने र साँझ परेपछि पैदलयात्री तथा दुईपाङ्ग्रे सवारीसाधनमाथि झम्टिने कुकुरका कारण दुर्घटनाको जोखिम अत्यधिक बढेको छ।

विशेष गरी स्कुटर, साइकल तथा मोटरसाइकल चालकहरू अचानक कुकुरको आक्रमणमा परी घाइते हुने घटनाहरू बढिरहेका छन्। पर्याप्त सडकबत्तीको अभावमा अँध्यारोमा हुने यस्ता आक्रमणले बाल-बालिका, ज्येष्ठ नागरिक र रात्रिकालीन यात्रुहरूलाई थप जोखिममा पारेको स्थानीय सरोकारवालाहरूले गुनासो गरेका छन्।

सामुदायिक कुकुरको सङ्ख्या नियन्त्रण गर्न नेपालगन्ज उपमहानगरपालिकाले विभिन्न वडाहरूमा बन्ध्याकरण तथा रेबिजविरुद्धको खोप अभियान सञ्चालन गरे पनि सडकमा कुकुरको उपस्थितिमा कमि आएको छैन। भेरी अस्पतालमा मात्रै जनावरको टोकाइका हजारौँ घटनाहरू अभिलेख हुनुले यो समस्या कति गम्भीर बन्दै गएको छ भन्ने प्रष्ट पार्छ।

बन्ध्याकरण मात्र पर्याप्त नभई कुकुरहरूको नियमित अनुगमन, नयाँ जन्मिएका छाडा कुकुरको व्यवस्थापन, फोहोर व्यवस्थापन र रेबिजविरुद्धको खोप कार्यक्रमलाई थप प्रभावकारी बनाउनुपर्ने माग स्थानीय बासिन्दा तथा सरोकारवालाहरूले गरेका छन्।