मधेशमा बाक्लो हुस्सु र शीतलहरले जनजीवन प्रभावित : पुस–माघको झल्को दिँदै सवारी आवागमनमा कठिनाइ

सप्तरी, कात्तिक १६ गते । मधेश प्रदेशमा सोमबार बिहानैदेखि अचानक बाक्लो हुस्सु र शीतलहर चलेपछि यस क्षेत्रको जनजीवन नराम्ररी प्रभावित भएको छ।

बिहानैदेखि लागेको बाक्लो कुहिरोका कारण सडक, खेतबारी र आसपासका दृश्यहरू पूर्ण रूपमा धमिलिएका छन् भने सवारी आवागमनसमेत अत्यन्तै सुस्त बनेको छ। मौसममा आएको यो अचानकको फेरबदलले हिउँदको महिना अर्थात् पुस–माघकै झल्को दिएको स्थानीयवासीहरूले बताएका छन्। हुस्सुसँगै चलेको चिसो सिरेटोले सर्वसाधारणलाई घरबाहिर निस्कन असहज बनाउँदा वृद्धवृद्धा, बालबालिका र दैनिक ज्यालादारी मजदुरहरू बढी मारमा परेका छन्।

सवारी चालकहरूका अनुसार सडकमा बाक्लो हुस्सुका कारण अगाडिका गाडीहरू स्पष्ट देख्न नसकिने अवस्था रहेको छ। राजविराजबाट धरानतर्फ विङ्गर गाडी लिएर जानुभएका चालक वीरेन्द्र यादवले बाटो नै नदेखिने गरी कुहिरो लागेका कारण निकै सावधानीपूर्वक कम गतिमा गाडी चलाउनुपरेको अनुभव सुनाउनुभयो। दृश्यता कम हुँदा दुर्घटनाको जोखिम उच्च भएकाले चालकहरूलाई सुरक्षित दूरी कायम गरेर हिँड्न आग्रह गरिएको छ। त्यसैगरी, स्थानीय बासिन्दा बिन्दुकुमार यादवले बाक्लो हुस्सुका कारण सडक भिजेझैँ भएको र पैदल हिँड्दासमेत शरीर ओसिलो हुने गरेको बताएका छन्।

यद्यपि, बिहानको समयमा पुस–माघ महिनाको जस्तै कडा चिसो महसुस नभए पनि बाक्लो हुस्सुले दैनिक जनजीवन र कामकाजमा भने प्रत्यक्ष असर पारेको छ। किसान, विद्यार्थी तथा बिहानै काममा निस्कनुपर्ने सर्वसाधारणको दिनचर्या हुस्सु र चिसोका कारण प्रभावित हुन पुगेको छ।

मौसममा आएको यस किसिमको परिवर्तनले आगामी दिनमा चिसो अझै बढ्ने अनुमान गरिएको छ। तराई तथा मधेशका जिल्लाहरूमा यसप्रकारको हुस्सुले सवारी साधन चलाउँदा विशेष सतर्कता अपनाउन यातायात कार्यालय तथा ट्राफिक प्रहरीले समेत अनुरोध गर्दै आएका छन्।