आर्थिक अवस्था कमजोर भएकै कारण कोही पनि उपचारबाट वञ्चित हुनुहुँदैन: स्वास्थ्यमन्त्री निशा मेहता

दाङ, असोज २३ गते । स्वास्थ्य तथा खाद्य स्वच्छता मन्त्री निशा मेहताले आर्थिक अवस्था कमजोर भएकै कारण देशका कुनै पनि नागरिक स्वास्थ्य उपचार पाउनबाट वञ्चित हुन नहुने बताउनुभएको छ।

दाङको घोराहीस्थित राप्ती स्वास्थ्य विज्ञान प्रतिष्ठानको नवौँ वार्षिकोत्सव समारोहलाई सम्बोधन गर्दै मन्त्री मेहताले विपन्न तथा लक्षित वर्गका लागि तोकिएको १० प्रतिशत निःशुल्क स्वास्थ्य सेवा अनिवार्य र प्रभावकारी रूपमा कार्यान्वयन गर्न निर्देशन दिनुभयो।

प्रतिष्ठानकी सह-कुलपति समेत रहनुभएकी मन्त्री मेहताले स्वास्थ्य संस्थाको ठुलो भवन हुनु मात्र नभई बिरामीले पाउने सेवाको गुणस्तर, छरितो प्रक्रिया र घट्दो लाइन नै वास्तविक सेवाको मापदण्ड भएको उल्लेख गर्नुभयो। उहाँले बिरामीलाई अनावश्यक रूपमा अन्य अस्पतालमा रिफर गर्ने परिपाटीको अन्त्य गर्दै प्रतिष्ठानले उपचारका साथै चिकित्सा अनुसन्धान कार्यलाई पनि प्राथमिकता दिनुपर्नेमा जोड दिनुभयो।

वार्षिकोत्सवका अवसरमा मन्त्री मेहताले प्रतिष्ठानमा मुटुरोगको विशिष्टीकृत उपचारका लागि नवप्रवर्द्धनात्मक ‘क्याथ ल्याब‘ (Cath Lab) को उद्घाटन गर्नुभयो। क्याथ ल्याब सञ्चालनमा आएसँगै दाङसहित पश्चिम नेपालका मुटुरोगीहरूले स्थानीयस्तरमै आधुनिक पहिचान र उपचार पाउने भएका छन्, जसले गर्दा थप उपचारका लागि काठमाडौँ वा अन्य सहर धाउनुपर्ने बाध्यता हट्ने अपेक्षा गरिएको छ।

प्रतिष्ठानका उपकुलपति डा. अजय मिश्रको अध्यक्षतामा सम्पन्न उक्त कार्यक्रममा मन्त्रालयका सचिव विकास देवकोटाले प्रतिष्ठानलाई ४०० शय्याको अत्याधुनिक अस्पतालका रूपमा विस्तार गर्न संघीय, प्रदेश र स्थानीय सरकारबिच बलियो सहकार्य हुनुपर्ने बताउनुभयो। कार्यक्रममा स्थानीय नागरिक समाज, पत्रकार महासंघका प्रतिनिधि तथा मन्त्रालयका पदाधिकारीहरूको उपस्थिति रहेको थियो।