कोहलपुर नगर अस्पतालमा असोज १९ देखि एन्टिरेबिज भ्याक्सिन सेवा: नेपालगन्ज धाउनुपर्ने बाध्यताको अन्त्य

कोहलपुर, असोज १६ गते । कुकुर तथा अन्य जनावरको टोकाइबाट रेबिजको जोखिममा परेका बाँकेका कोहलपुर र आसपास क्षेत्रका नागरिकले अब उपचारका लागि नेपालगन्ज धाउनुपर्ने बाध्यता हट्ने भएको छ। कोहलपुर नगरपालिका–११ स्थित नगर अस्पतालले पहिलोपटक नियमित रूपमा एन्टिरेबिज भ्याक्सिन (एआरभी) सेवा सञ्चालनमा ल्याउने निर्णय गरेको हो।

अस्पतालका अनुसार यही आगामी असोज १९ गतेदेखि एआरभी सेवा नियमित रूपमा सुरु हुनेछ। यसअघि कुकुर वा अन्य जनावरले टोकेपछि रेबिजविरुद्धको इन्जेक्सन लगाउनुपर्ने बिरामीहरू उपचारका लागि नेपालगन्जस्थित भेरी अस्पताल पुग्नुपर्ने बाध्यता रहेको थियो।

नगर अस्पतालमै खोप सेवा उपलब्ध भएपछि कोहलपुर, बैजनाथ र राप्तीसोनारी गाउँपालिकाका नागरिकको समय र यातायात खर्च दुवै बचत हुनेछ। विशेषगरी नियमित अन्तरालमा एकभन्दा बढी मात्रा (डोज) खोप लगाउनुपर्ने बिरामीहरूका लागि घरनजिकै सेवा उपलब्ध हुनु ठुलो राहत हुने अपेक्षा गरिएको छ।

कोहलपुर नगर अस्पतालका जनस्वास्थ्य अधिकृत प्रकाश विश्वकर्माका अनुसार अस्पतालबाट खोपसँगै आवश्यक चिकित्सकीय परामर्शसमेत उपलब्ध गराइनेछ। नगर अस्पतालले जनावरले टोकेको अवस्थामा ढिला नगरी अस्पतालमा सम्पर्क गरी चिकित्सकको सल्लाहअनुसार समयमै एआरभी सेवा लिन सर्वसाधारणलाई आग्रह गरेको छ।