दाउन्नेको एस मोडमा बस दुर्घटना: ६ जनाको मृत्यु, १० घाइते (मृतक र घाइतेको नामावलीसहित)

नवलपुर, असोज १७ गते । पूर्व–पश्चिम राजमार्गअन्तर्गत नवलपुरको विनयी त्रिवेणी गाउँपालिका–२ स्थित दाउन्नेको एस मोडमा शनिबार बिहान यात्रुवाहक बस दुर्घटना हुँदा ६ जनाको मृत्यु भएको छ। दुर्घटनामा १० जना घाइते भएका छन् भने घाइतेमध्ये एक जनाको अवस्था गम्भीर रहेको प्रहरीले जनाएको छ।

नेपालगञ्जबाट काठमाडौँतर्फ जाँदै गरेको प्रदेश ३–०१–००६ ख १५५३ नम्बरको बस ओरालो सडकमा चालकले नियन्त्रण गुमाउँदा नालामा पल्टिएर दुर्घटना भएको जिल्ला प्रहरी कार्यालय नवलपुरले जनाएको छ। बसमा चालकसहित कुल १८ जना सवार रहेकोमा दुई जना सकुशल रहेका छन्।

जिल्ला प्रहरी कार्यालयका सूचना अधिकारी प्रहरी नायब उपरीक्षक अनिल पण्डितका अनुसार मृत्यु हुनेहरूमा जाजरकोटका निर्जुङ्ग खत्री, बाँकेका दीपेन्द्र केसी र एकेन्द्रराज रेग्मी, बाजुराका नरेन्द्रराज गिरी तथा नेपालगञ्जका कृष कनौजिया रहेका छन्। अर्का एक मृतक पुरुष (अन्दाजी ४०–४२ वर्ष) को नामथर खुल्न बाँकी रहेको छ।

दुर्घटनाका १० जना घाइतेहरूमध्ये टाउकोमा गम्भीर चोट लागेका बाँकेका अस्लाम भगवानलाई थप उपचारका लागि नयाँ मेडिकल कलेज, चितवन रिफर गरिएको छ। अन्य घाइतेहरूको स्थानीय अस्पतालमा उपचार भइरहेको र घटनाबारे थप अनुसन्धान भइरहेको प्रहरीले जनाएको छ।