सेयर बजारमा भारी गिरावट : नेप्से ३२.६५ अंकले घट्दै २६५७ विन्दुमा कायम

काठमाडौँ, कात्तिक १६ गते । साताको पहिलो कारोबार दिन सोमबार नेपाली सेयर बजारमा ठूलो गिरावट आएको छ। कारोबार सुरु भएदेखि नै निरन्तर ओरालो लागेको बजार अन्त्यमा ३२.६५ अंकले घटेर २६५७ अंकमा सीमित हुन पुगेको छ।

यसअघिको कारोबार दिन नेप्से सामान्य ५ अंकले मात्र घटेको भए पनि आज बजारमा व्यापक दबाब देखिएको छ। नेप्से परिसूचकसँगै कुल कारोबार रकममा समेत गिरावट आएको छ, जसमा अघिल्लो दिन ८ अर्ब ८९ करोड रुपैयाँको सेयर कारोबार भएकोमा आज घटेर ७ अर्ब १८ करोड रुपैयाँमा झरेको छ।

बजारमा आएको तीव्र गिरावटबीच आज जम्मा २१ वटा कम्पनीको मात्र सेयर मूल्य बढेको छ भने २५२ वटा कम्पनीको मूल्य घटेको छ। साथै, ६ वटा कम्पनीको मूल्य भने स्थिर रहेको छ। आज कारोबारमा आएका सबै समूहगत सूचकहरू ऋणात्मक (रातो) भएका छन्। जसमा विकास बैंक समूह सबैभन्दा धेरै १.८८ प्रतिशतले घटेको छ भने निर्जीवन बीमा १.७२, अन्य १.६१, फाइनान्स १.५३ र बैंकिङ समूह १.०७ प्रतिशतले घटेका छन्।

घट्दो बजारका बाबजुद हालै सूचीकृत बेनी हाइड्रोपावरको सेयर मूल्य सबैभन्दा धेरै १५ प्रतिशतले बढेको छ। त्यसैगरी, मकर जितुमाया सुरी हाइड्रोपावरको ८.७७, मन्दाकिनी हाइड्रोपावरको ५.४७ र एनआईसी एसिया बैंकको ३.०२ प्रतिशतले मूल्य बढेको छ। यता, झापा इनर्जीको ४.११ र सांग्रिला डेभलपमेन्ट बैंकको ४.०८ प्रतिशतले मूल्य घटेको छ।

आज घलेम्दी हाइड्रोपावर, ग्लोबल आईएमई बैंक, कुमारी बैंक, लुम्बिनी विकास बैंक, मकर जितुमाया सुरी हाइड्रोपावर, ग्रिन भेन्चर्स, एनआईसी एसिया बैंक र प्राइम कमर्सियल बैंक लगायतका कम्पनीहरूको सर्वाधिक कारोबार भएको छ। बजारमा देखिएको यसप्रकारको तीव्र उतारचढावले लगानीकर्ताहरूलाई थप सतर्क बन्न प्रेरित गरेको छ।

टप गेनर्स (Top Gainers)

टप लुजर्स (Top Losers)