जनकपुरधामदेखि भारतको अयोध्यासम्म विशेष रेलसेवा सञ्चालनको तयारी तीव्र, प्रधानमन्त्रीको भारत भ्रमणका क्रममा उद्घाटन हुने

जनकपुरधाम, कात्तिक १६ गते । मधेश प्रदेशको राजधानी जनकपुरधामदेखि भारतको ऐतिहासिक तथा धार्मिक सहर अयोध्यासम्म विशेष रेलसेवा सञ्चालन गर्ने तयारी तीव्र पारिएको छ।

नेपाल रेलवे कम्पनीका प्रबन्ध सञ्चालक परिवेश पराजुलीका अनुसार प्रधानमन्त्रीको आसन्न भारत भ्रमणका क्रममा दुवै देशका प्रधानमन्त्रीले संयुक्त रूपमा यो विशेष रेलसेवाको उद्घाटन गर्नेगरी तयारी भइरहेको छ। सातामा एक दिन अयोध्याबाट जनकपुरधाम आउने गरी सञ्चालन हुने यस रेलसेवाले नेपाल र भारतबीचको धार्मिक तथा सांस्कृतिक सम्बन्धलाई थप सुदृढ बनाउने विश्वास गरिएको छ।

रेलसेवा सञ्चालनका लागि नेपाल र भारतका रेलवे कम्पनी, भन्सार, अध्यागमन तथा सुरक्षा अधिकारीहरूबीच विभिन्न चरणमा छलफल भइसकेको छ। दुवै देशका अधिकारीहरूको टोलीले जयनगर–जनकपुरधाम–कुर्था रेलखण्डको स्थलगत निरीक्षणसमेत गरिसकेको छ। सुरक्षा व्यवस्था अन्तर्गत नेपालतर्फ नेपाली सुरक्षा निकाय र भारततर्फ भारतीय सुरक्षा निकायले रेल र यात्रीको सुरक्षाको जिम्मेवारी लिने विषयमा सैद्धान्तिक सहमति भइसकेको प्रबन्ध सञ्चालक पराजुलीले जानकारी दिनुभएको छ।

माता जानकीको जन्मभूमि जनकपुरधाम र भगवान् श्रीरामको जन्मभूमि अयोध्यालाई सीधा रेलसेवामार्फत जोड्ने यस योजनाले दुवै देशका धार्मिक पर्यटक तथा तीर्थयात्रीहरूलाई आवातजावत गर्न अति सहज हुने जानकी मन्दिरका महन्तका उत्तराधिकारी रामरोशन दासले बताउनुभयो। त्यस्तै, जनकपुरधाम उद्योग वाणिज्य सङ्घका अध्यक्ष सुरेन्द्र भण्डारीले यस रेलसेवाको सञ्चालनले जनकपुरको होटल, यातायात र स्थानीय व्यापारमा सकारात्मक प्रभाव पार्ने र आर्थिक गतिविधि चलायमान हुने धारणा व्यक्त गर्नुभयो।

हाल नेपालमा भारतको जयनगरदेखि जनकपुरधाम हुँदै महोत्तरीको बिजलपुरासम्म नियमित रेलसेवा सञ्चालनमा रहेको छ। अयोध्या लक्षित यो विशेष रेलसेवा सञ्चालनमा आएपछि रामायण सर्किटको अवधारणा थप व्यावहारिक बन्ने र नेपाल–भारत पर्यटन प्रवर्द्धनमा ऐतिहासिक टेवा पुग्ने अपेक्षा गरिएको छ।