मधेश प्रदेशमा पहिलो ‘पीईएफए’ मूल्याङ्कन प्रतिवेदन सार्वजनिक: सार्वजनिक वित्त व्यवस्थापन पारदर्शी बनाउने मुख्यमन्त्रीको प्रतिबद्धता

जनकपुरधाम, असोज १२ गते । मधेश प्रदेशका मुख्यमन्त्री कृष्णप्रसाद यादवले प्रदेशको सार्वजनिक वित्त व्यवस्थापनलाई थप पारदर्शी, जवाफदेही र प्रभावकारी बनाउँदै लैजाने प्रतिबद्धता व्यक्त गर्नुभएको छ।

सोमबार जनकपुरधाममा आयोजित मधेश प्रदेशको पहिलो सार्वजनिक खर्च तथा वित्तीय जवाफदेहिता (PEFA) मूल्याङ्कन प्रतिवेदन सार्वजनिक कार्यक्रममा बोल्दै उहाँले सीमित स्रोतसाधनको अधिकतम उपयोग गरी गुणस्तरीय सेवा प्रवाह गर्न सरकार प्रतिबद्ध रहेको बताउनुभयो।

मुख्यमन्त्री यादवका अनुसार मूल्याङ्कनले प्रदेशको वित्तीय पारदर्शिता र बजेट योजना व्यवस्थापनका आधारभूत संरचनामा सकारात्मक प्रगति देखाएको छ। मधेश प्रदेश पीईएफए मूल्याङ्कन गर्ने नेपालको दोस्रो प्रदेश बनेको उल्लेख गर्दै उहाँले सार्वजनिक खरिद, आन्तरिक नियन्त्रण र वित्तीय निगरानीका क्षेत्रमा प्राप्त निष्कर्षहरूलाई कमजोरीको रूपमा नलिई संस्थागत क्षमता सुधारको अवसरका रूपमा उपयोग गरिने स्पष्ट पार्नुभयो।

कार्यक्रममा एसियाली विकास बैंक (ADB) नेपालका निर्देशक अर्नोड कासोइसले यो मूल्याङ्कनले सङ्घीयतालाई थप बलियो बनाउन सहयोग पुग्ने बताउनुभयो। त्यस्तै मूल्याङ्कन परामर्शदाता प्रकाशजङ्ग थापाले सार्वजनिक वित्तीय व्यवस्थापनका आधारभूत पक्षहरूमा अझै सुधारको आवश्यकता औँल्याउनुभयो भने प्रदेशका अर्थमन्त्री युवराज भट्टराईले प्रतिवेदनले आर्थिक सुशासनको बाटो पहिल्याउन बलियो आधार तयार पारेको उल्लेख गर्नुभयो।

आर्थिक पत्रकार समाज नेपाल (सेजन), मधेश प्रदेश सरकार र एसियाली विकास बैंक (एडीबी) को संयुक्त आयोजनामा भएको उक्त कार्यक्रममा प्रदेश नीति तथा योजना आयोगका उपाध्यक्ष राजकुमार सिंह, सेजनका केन्द्रीय अध्यक्ष भागवत भट्टराई लगायत आर्थिक क्षेत्रका विभिन्न निकायका प्रतिनिधिहरूको सहभागिता रहेको थियो।