‘राज्य राज्यजस्तो छैन, सरकार सरकारजस्तो छैन’ : महासचिव शंकर पोखरेल

काठमाडौँ, कात्तिक १६ गते । नेकपा (एमाले) का महासचिव शंकर पोखरेलले वर्तमान सरकार प्रमुखले राज्य सञ्चालनलाई खेलौना जस्तो बनाएको गम्भीर आरोप लगाउनुभएको छ।

प्रेस चौतारी नेपाल, रुपन्देहीले सोमबार बुटवलमा आयोजना गरेको पत्रकार भेटघाट कार्यक्रममा बोल्दै उहाँले सरकारका हरेक गतिविधिहरू संविधान र लोकतन्त्रलाई कमजोर बनाउने दिशामा केन्द्रित रहेको दाबी गर्नुभयो। राज्यको जिम्मेवार पदमा रहेका व्यक्तिहरू अत्यधिक संयमित र उत्तरदायी हुनुपर्नेमा सामाजिक सञ्जालका गतिविधिमार्फत राज्यको जिम्मेवारीलाई बालबालिकाको खेलौना जस्तो बनाइएको उहाँको टिप्पणी थियो।

प्रधानमन्त्रीका प्रमुख सल्लाहकारले समेत पत्रकारहरूलाई लक्षित गर्दै असान्दर्भिक अभिव्यक्ति दिने गरेको उल्लेख गर्दै महासचिव पोखरेलले राज्य यस्तो प्रकारको ठट्टा वा मजाकको विषय बन्न नहुने स्पष्ट पार्नुभयो। कार्यकारी भूमिकामा रहेका व्यक्तिहरूको सामाजिक सञ्जालका गतिविधिले राज्य राज्यजस्तो र सरकार सरकारजस्तो नरहेको अनुभूति गराएको उहाँले बताउनुभयो। सरकारका हालका गतिविधिले मुलुकको लोकतान्त्रिक व्यवस्थाको भविष्यमाथि नै गम्भीर संकट उत्पन्न हुने संकेत देखाएको पोखरेलको भनाइ थियो।

“आज हाम्रा मुलुकका कार्यकारी भूमिकामा रहेका मान्छेहरूका सोसल मिडियाका गतिविधिहरू हेर्ने हो, पढ्ने हो भने राज्य बालबालिकाहरूले खेल्ने भाँडाकुटी जस्तो विषय बनाइएको छ । राज्य राज्यजस्तो छैन, सरकार सरकारजस्तो छैन ।” – शंकर पोखरेल, महासचिव

विद्यार्थी सङ्गठन, ट्रेड युनियन, व्यावसायिक सङ्गठन र सञ्चारमाध्यममाथि राज्यको नियन्त्रण र हस्तक्षेप दिनप्रतिदिन बढ्दै गएकोप्रति उहाँले आपत्ति जनाउनुभयो। लोकतन्त्रको मुख्य आधार संगठित हुने अधिकार र अभिव्यक्ति स्वतन्त्रता भए पनि विश्वविद्यालय तथा क्याम्पसहरूमा ट्रेड युनियन अधिकार नियन्त्रण गर्ने र व्यावसायिक सङ्गठनहरूलाई गतिविधि गर्न रोक लगाउने काम सरकारबाटै भइरहेको उहाँले आरोप लगाउनुभयो।

महासचिव पोखरेलले वर्तमान सरकारका गतिविधिहरूप्रति सत्तारूढ घटक राष्ट्रिय स्वतन्त्र पार्टी (रास्वपा) समेत सन्तुष्ट नरहेको दाबी गर्नुभयो। राज्य सञ्चालनको शैलीप्रति जनगुनासो बढ्दै गएकाले यसलाई समयमै सुधार नगरे लोकतन्त्र र राजनीतिक स्थिरतामाथि ठूलो असर पर्ने चेतावनी उहाँले दिनुभयो।