नेकपा राष्ट्रिय जागरण अभियान : बर्दिबासमा पैदलयात्रा गर्दै संयोजक प्रचण्डद्वारा पार्टी सुदृढीकरणमा जोड

महोत्तरी, कात्तिक १६ गते । नेपाली कम्युनिष्ट पार्टीका संयोजक तथा पूर्वप्रधानमन्त्री पुष्पकमल दाहाल ‘प्रचण्ड’ सहितका नेताहरूले सोमबार महोत्तरी जिल्लाको बर्दिबासमा राष्ट्रिय जागरण अभियानअन्तर्गत पैदल यात्रा गर्नुभएको छ।

पार्टीका मधेश संयोजक महेन्द्रप्रसाद यादवसहितका नेताहरूको उपस्थिति रहेको सो अभियान लोकतन्त्र र जन-अधिकारको रक्षा, राष्ट्रिय स्वाधीनता, सदस्यता नवीकरण र पार्टी सङ्गठन सुदृढीकरणका लागि सञ्चालन गरिएको संयोजक प्रचण्डले बताउनुभयो। बर्दिबासका स्थानीयबासीले देखाएको उत्साहप्रति धन्यवाद ज्ञापन गर्दै उहाँले कात्तिक ७ गतेदेखि सुरु भएको यस अभियानको समीक्षा गरी आगामी कार्यदिशा तय गरिने जानकारी दिनुभयो।

सञ्चारकर्मीहरूसँग कुराकानी गर्दै संयोजक प्रचण्डले वर्तमान सरकारको कार्यशैली बौद्धिक समुदाय र बुद्धिजीवीहरूले बुझिसकेको उल्लेख गर्नुहुँदै अब गाउँ-गाउँ गएर जनतालाई समेत यसबारे बुझाउने बताउनुभयो। एमाले र अन्य दलहरूसँगको सहकार्यको विषयमा भने हाल कुनै एजेन्डा नभएको र यो तत्काल सम्भव नरहेको उहाँले प्रष्ट पार्नुभयो।

यसै क्रममा महोत्तरीको सम्सी गाउँपालिका वडा नं. ६ मा आयोजित कार्यकर्ता भेटघाट कार्यक्रममा मातृका यादव, भरत साह, महेन्द्रप्रसाद यादव लगायतका नेताहरूको समेत सहभागिता रहेको थियो।

सम्सीमा आयोजित कार्यक्रममा सम्बोधन गर्दै संयोजक प्रचण्डले आगामी स्थानीय तहको निर्वाचनमा पार्टीका नेता तथा कार्यकर्ताहरूलाई सम्पूर्ण रूपमा एकजुट भएर लाग्न आह्वान गर्नुभयो। पार्टीले सिफारिस गरेका उम्मेदवारहरूलाई विजयी गराउनु अहिलेको मुख्य आवश्यकता रहेको औंल्याउँदै उहाँले पार्टीलाई थप सबल र एकताबद्ध बनाउनुपर्नेमा जोड दिनुभयो।

मधेस प्रदेशका विभिन्न जिल्लामा सञ्चालित यस जागरण अभियानले पार्टी पंक्तिमा नयाँ ऊर्जा थप्ने विश्वास गरिएको छ। जनताका गुनासा सुन्ने र संगठनलाई ग्रासरुट तहसम्म बलियो बनाउने उद्देश्यसहित नेकपाले अभियानलाई तीव्र बनाउँदै लगेको छ।