बाढी प्रभावितलाई बिमा दाबी भुक्तानीमा ठुलो सहजता : आवश्यक कागजात र प्रक्रियामा सरलीकरण गर्न प्राधिकरणको निर्देशन

काठमाडौँ, कात्तिक १८ गते । गत भदौ १० गतेको रसुवा बाढीबाट प्रभावित भई जीवन बिमा गरेका परिवारलाई राहत पुग्ने गरी बिमा रकम भुक्तानी प्रक्रिया अत्यधिक सहज बनाइएको छ।

नेपाल बिमा प्राधिकरणले जीवन बिमा तथा लघु जीवन बिमा कम्पनीहरूलाई मृत्यु दाबी, बिमालेख समर्पण, बिमालेख धितो कर्जा र अवधि पूरा भएपछि पाइने रकम भुक्तानी गर्दा आवश्यक कागजात तथा प्रक्रियामा विशेष सहजीकरण गर्न निर्देशन जारी गरेको हो। ल्हेन्दे खोला, भोटेकोशी, त्रिशूली र नारायणी नदी प्रणालीका बाढी प्रभावित क्षेत्रका बिमित तथा हकवालाहरू यसबाट लाभान्वित हुनेछन्।

विपत्का कारण कागजात नष्ट भएको वा हराएको अवस्थालाई मध्यनजर गर्दै प्राधिकरणले दाबी प्रक्रियालाई निकै सरल बनाएको छ। निर्देशिका अनुसार बाढीबाट मृत्य भएका बिमितको दाबी गर्दा निवेदनमा नाम, मिति, कारण, बिमालेख नम्बर र नाता खुलाए पुग्नेछ भने नागरिकता, राहदानी वा राष्ट्रिय परिचयपत्रजस्ता सरकारी कागजातमध्ये कुनै एक पेस गरे हुनेछ। साथै, बाढीले सक्कल बिमालेख नष्ट भएको अवस्थामा कम्पनीको अभिलेखको प्रतिलिपि प्रयोग गर्न सकिने र त्यस्तो प्रतिलिपि कम्पनीले निःशुल्क उपलब्ध गराउनुपर्ने व्यवस्था गरिएको छ।

बाढीका कारण व्यक्तिको मृत्यु वा बेपत्ता भएको विषय प्रमाणित गर्न अधिकार प्राप्त निकायको सिफारिस पत्र वा मृत्युको न्यायिक घोषणालाई पनि प्रमाणका रूपमा स्वीकार गरिनेछ। विपत्मा परेका कारण तोकिएको समयमै बिमाशुल्क वा बिमालेख कर्जाको नियमित किस्ता तिर्न नसकेका बिमितहरूलाई समेत यस व्यवस्थाले ठुलो आर्थिक राहत पुग्ने विश्वास लिइएको छ।

बिमा कम्पनीहरूले पनि यस्ता सङ्कटका बेला कागजातको अभाव देखाएर बीमितलाई सास्ती नदिई उपलब्ध विवरणका आधारमा अभिलेख अद्यावधिक गरी छिटोभन्दा छिटो दाबी भुक्तानी दिनुपर्नेछ। प्राधिकरणको यस कदमले बाढीबाट सर्वस्व गुमाएका परिवारलाई राहतको महसुस गराउनुका साथै वित्तीय सुरक्षाको प्रत्याभूति गराउनेछ।