सुन्दरीजलमा मोटरसाइकल दुर्घटना : मादक पदार्थ सेवन गरी चलाएको मोटरसाइकलको ठक्करबाट एक जनाको मृत्यु

काठमाडौँ, कात्तिक १७ गते । काठमाडौँको सुन्दरीजलमा गए राति दुई वटा मोटरसाइकल आपसमा ठोक्किएर भएको दुर्घटनामा एक जनाको ज्यान गएको छ।

काठमाडौँ उपत्यका ट्राफिक कार्यालयका अनुसार सुन्दरीजलबाट नाम्गेलतर्फ जाँदै गरेको बा.प्र. ०२०६५ प ९१५७ नम्बरको मोटरसाइकललाई सोही दिशाबाट पछाडिबाट तीव्र गतिमा आउँदै गरेको बा.प्र. ०२०५८ प ७४०५ नम्बरको मोटरसाइकलले ठक्कर दिएको थियो।

सो दुर्घटनामा परी गम्भीर घाइते भएका ४५ वर्षीय सन्तोष ढुङ्गानाको उपचारका क्रममा नेपाल मेडिकल कलेज अत्तरखेलमा निधन भएको हो। सुनसरीको इटहरी उपमहानगरपालिका–७ घर भई हाल काठमाडौँको गोकर्णेश्वर नगरपालिका–१ दोबाटो बस्दै आएका ढुङ्गाना सोही मोटरसाइकलमा सवार हुनुहुन्थ्यो।

दुर्घटनामा ठक्कर दिने बा.प्र. ०२०५८ प ७४०५ नम्बरको मोटरसाइकलका चालक सङ्खुवासभा घर भई गोकर्णेश्वर बस्ने ५० वर्षीय टीकाराम गुरुङ घाइते हुनुभएको छ भने उहाँको बाँया कुम, बाँया खुट्टा र दायाँ हातमा चोट लागेको छ।

ट्राफिक प्रहरीका अनुसार दुर्घटना गराउने मोटरसाइकलका चालक गोकर्णेश्वरकै २४ वर्षीय आशबहादुर तामाङले मादक पदार्थ सेवन (मापसे) गरी सवारी चलाएको पाइएको छ। काठमाडौँ उपत्यका ट्राफिक कार्यालयका प्रवक्ता तथा प्रहरी उपरीक्षक नरेशराज सुवेदीले घटनाको बारेमा थप अनुसन्धान भइरहेको जानकारी दिनुभएको छ।

मादक पदार्थ सेवन गरेर लापरबाहीपूर्वक सवारी चलाउँदा यस्ता किसिमका दुर्घटनाहरू बढ्दै गएकाले ट्राफिक प्रहरीले कडाइ गर्नुपर्ने स्थानीय बासिन्दाहरूको माग रहेको छ। यस दुःखद घटनाले परिवारमा ठुलो क्षति पुर्‍याएको छ भने दोषीमाथि कडा कानुनी कारबाही हुनुपर्नेमा जोड दिइएको छ।

प्रहरीले सडक सुरक्षालाई मध्यनजर गर्दै रात्रिकालीन समयमा मादक पदार्थ सेवन गरी सवारी चलाउने चालकहरूविरुद्धको चेकिङ तथा निगरानीलाई थप कडा बनाउने भएको छ। सुरक्षित यातायातको पालना गर्न र नियम विपरीत सवारी नचलाउन सम्बन्धित निकायले सबैमा अपिल गरेको छ।