जलवायु परिवर्तन र वातावरणीय समस्या समाधानमा स्विट्जरल्यान्डसँग सहकार्य गर्न नेपाल उत्सुक : राष्ट्रपति पौडेल

काठमाडौँ, कात्तिक १७ गते । राष्ट्रपति रामचन्द्र पौडेलले जलवायु परिवर्तन तथा हिमाली क्षेत्रका गम्भीर वातावरणीय समस्याहरू समाधान गर्न नेपाल स्विट्जरल्यान्डसँग सहकार्य गर्न उत्सुक रहेको स्पष्ट पार्नुभएको छ।

नेपाल भ्रमणमा रहेको स्विट्जरल्यान्डको राष्ट्रिय परिषद्का अध्यक्ष पियरे आन्द्रे पेजको नेतृत्वमा आएको प्रतिनिधिमण्डलले राष्ट्रपति भवन शीतल निवासमा सोमबार शिष्टाचार भेट गरेको अवसरमा राष्ट्रपति पौडेलले सो धारणा व्यक्त गर्नुभएको हो। भेटका क्रममा राष्ट्रपतिले नेपालको शान्ति प्रक्रिया, लोकतन्त्र, सङ्घीयता र सामाजिक–आर्थिक विकासमा स्विट्जरल्यान्ड सरकारले पुर्‍याउँदै आएको निरन्तर सहयोगप्रति विशेष धन्यवाद ज्ञापन गर्नुभयो।

सो अवसरमा स्विस राष्ट्रिय परिषद्का अध्यक्ष पियरेले हिमाली क्षेत्रमा देखिएका जलवायुजन्य परिवर्तनहरूलाई सङ्केत गर्दै हिमालहरू चलायमान हुँदै गएको वर्तमान अवस्थामा पूर्वसूचना प्रणाली अत्यन्त महत्त्वपूर्ण हुने उल्लेख गर्नुभयो। स्विट्जरल्यान्ड यसै क्षेत्रमा विभिन्न काम गरिरहेको सन्दर्भमा नेपालसँग सहकार्य गरेर अगाडि बढ्न इच्छुक रहेको उहाँले बताउनुभयो। जलवायु परिवर्तनको असरबाट हिमालय बचाउन र विपद् जोखिम न्यूनीकरण गर्न यस्ता सहकार्यहरू अपरिहार्य हुने दुवै पक्षले औंल्याएका छन्।

सोमबार नै स्विस राष्ट्रिय परिषद्का अध्यक्ष पियरेले प्रतिनिधिमण्डलसहित सभामुख डोलप्रसाद अर्याल र राष्ट्रिय सभाका अध्यक्ष नारायणप्रसाद दाहालसँग पनि छुट्टाछुट्टै शिष्टाचार भेटवार्ता गर्नुभएको छ। सभामुख अर्यालसँग भएको भेटमा नेपाल लोकतन्त्रलाई सुदृढ बनाउन तथा स्थानीय तहसम्म लोकतान्त्रिक संस्थाहरूलाई सशक्त बनाउने प्रयासमा रहेको चर्चा गरिएको थियो भने स्विस अभ्यासको उच्च प्रशंसा गरिएको थियो।

दुई देशबीचको यस उच्चस्तरीय भेटघाटले नेपाल र स्विट्जरल्यान्डबीचको द्विपक्षीय सम्बन्धलाई थप सुदृढ बनाउनुका साथै संसदीय सहकार्य र वातावरणीय मुद्दाहरूमा साझा पहलकदमी लिन महत्त्वपूर्ण योगदान पुर्‍याउने विश्वास लिइएको छ।