दशौँ राष्ट्रिय खेलकुद प्रतियोगिताको तीव्र तयारी : ३० दिनको ‘काउन्टडाउन’ सुरु, मङ्सिर १६ देखि हुने

कर्णाली, कात्तिक १७ गते । शिक्षा तथा खेलकुदमन्त्री सस्मित पोखरेलले आगामी मङ्सिर १६ देखि २७ गतेसम्म सञ्चालन हुने दशौँ राष्ट्रिय खेलकुद प्रतियोगिताको तीव्र तयारी भइरहेको जानकारी दिनुभएको छ।

प्रतियोगिता आउन ३० दिन बाँकी रहँदा ‘काउन्टडाउन’ को शुभारम्भ गर्दै मन्त्री पोखरेलले सङ्घ, कर्णाली प्रदेश सरकार र वीरेन्द्रनगर नगरपालिकाको सहकार्यमा आवश्यक पूर्वाधार निर्माण, जनशक्ति व्यवस्थापन र स्रोत परिचालन भइसकेको स्पष्ट पार्नुभयो। खेलकुदको यो महामेला भव्य रूपमा सफल बनाउन सबै सरोकारवाला निकायले इमान्दारीपूर्वक आफ्नो भूमिका निर्वाह गर्नुपर्नेमा उहाँले जोड दिनुभयो।

कर्णाली प्रदेशका मुख्यमन्त्री मङ्गलबहादुर शाहीले दशौँ राष्ट्रिय खेलकुद प्रतियोगिता सम्पन्न गर्नु कर्णालीको प्रतिष्ठासँग जोडिएको विषय भएको बताउनुभएको छ। रङ्गशालाको पूर्वाधार निर्माणका सबै कामहरू लगभग पूरा भइसकेको जनाउँदै उहाँले पाहुनाहरूको बसाइँ व्यवस्थापन र सबैका लागि सहज वातावरण बनाउन प्रदेश सरकार पूर्ण रूपमा लागिपरेको उल्लेख गर्नुभयो।

त्यस्तै, सामाजिक विकासमन्त्री जीतबहादुर मल्लले पनि प्रतियोगिता सफल बनाउन कुनै पनि कसर बाँकी नराख्ने प्रतिबद्धता व्यक्त गर्नुभएको छ।

राष्ट्रिय खेलकुद परिषद्का सदस्य सचिव रामचरित्र मेहताले प्रतियोगिताको प्रचार-प्रसारलाई राष्ट्रव्यापी रूपमा तीव्र पारिएको जानकारी दिनुभएको छ। कर्णाली प्रदेश खेलकुद विकास परिषद्का सदस्य रवीन्द्र चन्दले यसै सन्दर्भमा कर्णालीको विशेष खेलकुद गीत सार्वजनिक गर्दै आगामी एक हप्ताभित्रै रङ्गशालाका सम्पूर्ण संरचनाहरू औपचारिक रूपमा हस्तान्तरण हुने जानकारी गराउनुभयो।

मङ्सिर १६ देखि २७ गतेसम्म सञ्चालन हुने यस प्रतियोगिताले कर्णाली प्रदेशको खेलकुद विकास र पर्यटन प्रवर्द्धनमा ऐतिहासिक योगदान पुर्‍याउने अपेक्षा गरिएको छ। तयारी अन्तिम चरणमा पुगेसँगै खेलाडी तथा खेलप्रेमीहरूमा पनि ठूलो उत्साह छाएको छ।