नगरकोटमा वर्ल्डलिंकद्वारा नयाँ सम्पर्क कार्यालय सञ्चालन : होटल तथा आतिथ्य क्षेत्रको डिजिटल कनेक्टिभिटीलाई प्राथमिकता

नगरकोट, कात्तिक १७ गते । काठमाडौँ नजिकैको प्रमुख पर्यटकीय गन्तव्य नगरकोटमा पर्यटन तथा आतिथ्य क्षेत्रको डिजिटल सेवा र व्यावसायिक कनेक्टिभिटीलाई थप सहज बनाउने उद्देश्यसहित वर्ल्डलिंक कम्युनिकेसन्स लिमिटेडले नयाँ सम्पर्क कार्यालय सञ्चालनमा ल्याएको छ।

नेपालको अग्रणी इन्टरनेट सेवा प्रदायक कम्पनीका रूपमा परिचित वर्ल्डलिंकले सुरु गरेको यो कार्यालयले विशेषगरी यहाँका होटल, रिसोर्ट, रेस्टुरेन्ट तथा अन्य पर्यटनसम्बद्ध व्यवसायसँगको सम्बन्ध विस्तार र सहकार्यलाई उच्च प्राथमिकता दिनेछ। प्राकृतिक सौन्दर्य र हिमशृङ्खला अवलोकनका लागि देश-विदेशबाट आउने पर्यटकहरूका कारण नगरकोटमा आतिथ्य व्यवसाय दिनप्रतिदिन विस्तार हुँदै गएको छ।

पछिल्लो समय पर्यटकको अनलाइन बुकिङ, डिजिटल भुक्तानी, सञ्चार, ग्राहक सेवा तथा होटलको दैनिक व्यवस्थापनजस्ता गतिविधिमा भरपर्दो इन्टरनेट अनिवार्य आवश्यकता बन्दै गएको छ। यस सन्दर्भमा वर्ल्डलिंकको नयाँ सम्पर्क कार्यालयले स्थानीय पर्यटन व्यवसायीहरूलाई आवश्यक पर्ने डिजिटल समाधानबारे जानकारी तथा सेवा समन्वयमा ठुलो सहयोग पुर्‍याउने अपेक्षा गरिएको छ। नगरकोटस्थित यो सम्पर्क कार्यालयले मुख्य रूपमा इन्टरप्राइज बिक्री तथा व्यवसाय विकासमा केन्द्रित भई होटल, रिसोर्ट र व्यावसायिक प्रतिष्ठानहरूका कनेक्टिभिटीसम्बन्धी आवश्यकता बुझ्ने र प्रत्यक्ष समन्वय गर्ने लक्ष्य लिएको छ।

स्थानीय व्यवसायहरूसँग प्रत्यक्ष सम्पर्क विस्तार गर्दै नयाँ व्यावसायिक सम्भावनाहरूको पहिचान गर्ने र ग्राहकका आवश्यकताअनुसार छिटो सेवा पुर्‍याउने कम्पनीको योजना रहेको छ। नगरकोट नेपालको अत्यन्तै महत्त्वपूर्ण पर्यटकीय गन्तव्यको रूपमा विकसित भइरहेका बेला भौतिक पूर्वाधारसँगै डिजिटल पूर्वाधारको विकास पनि उत्तिकै अपरिहार्य बनेको छ। वर्ल्डलिंकको यो कदमले यहाँको पर्यटन तथा आतिथ्य व्यवसायलाई डिजिटल रूपमा थप सक्षम र प्रभावकारी बनाउन महत्त्वपूर्ण सहयोग पुग्ने विश्वास लिइएको छ।

नगरकोटमा सम्पर्क कार्यालय सञ्चालनसँगै वर्ल्डलिंकले नेपालभरका व्यावसायिक संस्थाहरूमा आफ्नो पहुँच विस्तार गर्दै उनीहरूको डिजिटल कनेक्टिभिटी आवश्यकतालाई परिपूर्तिको प्रयासलाई निरन्तरता दिएको छ। यसबाट स्थानीय व्यवसायी र सेवाग्राही दुवै लाभान्वित हुनेछन्।