भोटेकोशी बाढीको क्षतिबापत २१ अर्बको बिमा दाबी: ५ लाखसम्मको दाबीमा सर्भेयर नचाहिने (विस्तृत विवरण)

काठमाडौँ, असोज १४ गते । भोटेकोशी, त्रिशूली र नारायणी क्षेत्रमा आएको भीषण बाढीले पुर्‍याएको भौतिक तथा आर्थिक क्षतिको विवरण बिमा दाबीमार्फत बाहिर आउन थालेको छ।

नेपाल बिमा प्राधिकरणका अनुसार प्रभावित २ हजार १८० बिमितहरूबाट करिब २१ अर्ब (२० अर्ब ९८ करोड ८७ लाख) रुपियाँ बराबरको प्रारम्भिक क्षतिपूर्ति दाबी परेको छ।

दाबी परेको कुल रकममध्ये सर्वाधिक हिस्सा सम्पत्ति बिमा र इन्जिनियरिङ बिमाको रहेको छ। ५१८ वटा दाबीमार्फत सम्पत्ति बिमातर्फ मात्रै ९ अर्ब ४१ करोड ५८ लाख रुपियाँको दाबी छ भने १ हजार ६६ वटा दाबीसहित मोटर बिमातर्फ ३ अर्ब ७ करोड ९३ लाख रुपियाँको दाबी परेको छ। कम्पनीगत आधारमा हिमालयन एभरेस्ट इन्स्योरेन्समा सबैभन्दा बढी ६ अर्ब २७ करोड रुपियाँ भन्दा बढीको दाबी परेको छ।

ठूलो रकमको दाबी परे पनि हालसम्म ६७ लाख ४८ हजार रुपियाँ मात्र भुक्तानी भएको छ। सर्वसाधारण र स्थानीय व्यवसायीहरू अझै उद्धार तथा राहतकै चरणमा रहेकाले संस्थागत बाहेकका दाबी आउन बाँकी रहेको प्राधिकरणले जनाएको छ। दाबी भुक्तानी प्रक्रियालाई छिटो र पारदर्शी बनाउन प्राधिकरणले ‘रसुवा बाढी दाबी भुक्तानीसम्बन्धी सङ्क्षिप्त कार्यविधि, २०८३’ लागु गरेको छ।

नयाँ कार्यविधि अनुसार ५ लाख रुपियाँसम्मको सरल दाबीमा बाह्य सर्भेयर नचाहिने र बिमा कम्पनीका कर्मचारीले नै क्षति मूल्याङ्कन गर्न सक्नेछन्। साथै, ठूलो क्षति भएका बिमितलाई अनुमानित दायित्वको ५० प्रतिशतसम्म अग्रिम भुक्तानी दिइनेछ। कागजात हराएको वा नष्ट भएको अवस्थामा फोटो, भिडियो, बैंक तथा कर अभिलेख जस्ता वैकल्पिक प्रमाणलाई मान्यता दिने व्यवस्था गरिएको छ।

मुख्य विवरण तथा बिमा दाबी सारसंक्षेप