समाजमा व्याप्त घृणा, निषेध र पूर्वाग्रह अन्त्य गर्दै सकारात्मक ऊर्जा प्रवाह गर्नु आजको आवश्यकता हो : सभापति गगन थापा

चन्द्रनिगाहपुर, कात्तिक २९ गते । नेपाली कांग्रेसका सभापति गगनकुमार थापाले नेपाली समाजमा व्याप्त नकारात्मकता, घृणा, निषेध र पूर्वाग्रहको अन्त्य गर्दै सर्वत्र सकारात्मक ऊर्जा प्रवाह गर्नु अहिलेको मुख्य आवश्यकता भएको बताएका छन्।

पार्टीको १५ औँ महाधिवेशनपछि पहिलोपटक मधेश भ्रमणका क्रममा रौतहटको चन्द्रनिगाहपुर पुग्नुभएका सभापति थापाले चन्द्रपुर नगर समितिद्वारा आयोजित भेटघाट कार्यक्रमलाई सम्बोधन गर्दै देशले यतिबेला सकारात्मक सोचको खोजी गरिरहेको स्पष्ट पार्नुभयो। वर्तमान सरकारका गतिविधिहरूप्रति लक्षित गर्दै उहाँले समाजले अब थप नकारात्मकता र पूर्वाग्रह बोक्न नसक्ने धारणा राख्नुभयो।

विगतमा पनि पार्टीले विभिन्न घेराबन्दी र चुनौतीहरूको सामना गर्दै आएको स्मरण गराउँदै सभापति थापाले अहिलेका राजनीतिक षड्यन्त्र तथा अवरोधहरूलाई पनि कांग्रेसले सफलतापूर्वक चिर्दै अघि बढ्ने दाबी गर्नुभयो।

समाजलाई घृणा र प्रतिशोधको राजनीतिबाट मुक्त गराउने अभियानमा पार्टी होमिएको बताउँदै उहाँले कांग्रेसका लागि निर्वाचनभन्दा पार्टी र देशको दीर्घकालीन भविष्य सदैव ठूलो हुने उल्लेख गर्नुभयो। माओवादी द्वन्द्वकाल लगायत विभिन्न जटिल परिस्थितिहरूमा समेत जुधेर आएको कांग्रेसले वर्तमान राजनीतिक परिस्थितिलाई गहिरो रूपमा बुझेर त्यसको उचित निकास दिने प्रतिबद्धता उहाँले व्यक्त गर्नुभयो।

समाजलाई अन्धकारबाट उज्यालोतर्फ डोर्‍याउने अभिभारा अब कांग्रेसले लिनुपर्नेमा जोड दिँदै सभापति थापाले समाजमा फैलिएको निराशाजनक भाष्यलाई चिर्न चाँडै नै देशव्यापी अभियान सञ्चालन गरिने जानकारी दिनुभयो। यसका लागि पार्टीका नेता तथा कार्यकर्ताहरू एक महिनासम्म गाउँगाउँ र बस्ती-बस्तीमा पुग्ने कार्यक्रम तय गरिएको उहाँको भनाइ थियो।

“केही भएन, सबै बिग्रियो भन्ने गलत भाष्यलाई चिर्न अब कांग्रेस गाउँगाउँ जान्छ र समाजमा सकारात्मक सन्देश प्रवाह गर्छ,” उहाँले थप्नुभयो।

साथै, उहाँले नेता तथा कार्यकर्ताहरूलाई जिल्ला र प्रदेश अधिवेशनको तयारीमा जुट्न निर्देशनसमेत दिनुभयो भने छठ पर्वको अवसरमा सम्पूर्ण देशवासीमा शुभकामना व्यक्त गर्नुभयो। कार्यक्रमपछि उहाँ मकवानपुरमा भएको सवारी दुर्घटनामा परि ज्यान गुमाएका सर्लाहीका पीडित परिवारलाई भेट्न प्रस्थान गर्ने कार्यक्रम रहेको छ।