छठ पर्वले सबै प्रकारका विभेद र विसङ्गतिको अन्त्य गरी राष्ट्रिय एकता अभिवृद्धि गर्छ : राष्ट्रपति पौडेल

काठमाडौँ, कात्तिक २९ गते । राष्ट्रपति रामचन्द्र पौडेलले छठ पर्वले समाजमा विद्यमान वर्गीय, जातीय, लैङ्गिकलगायत सबै प्रकारका विभेद, कुरीति र विसङ्गतिहरूको अन्त्य गर्दै सम्पूर्ण नेपालीहरूबीच राष्ट्रिय एकता अभिवृद्धि गर्न महत्त्वपूर्ण योगदान पुर्‍याउने विश्वास व्यक्त गर्नुभएको छ।

छठ पर्व २०८३ का अवसरमा आज शुभकामना सन्देश जारी गर्दै उहाँले मौलिक संस्कृतिको संरक्षण तथा संवर्द्धन गर्न र आपसी सद्भावलाई थप सुदृढ पार्न यस पर्वले सबैलाई प्रेरणा प्रदान गर्ने बताउनुभएको छ।

दीर्घायु, स्वच्छता, सात्विक भोजन, संयमता, सद्भाव र समृद्धिको कामनासहित मनाइने छठ पर्वले सूर्य देवको आराधना गर्दै सामाजिक तथा प्राकृतिक सन्तुलन कायम गर्ने सन्देश प्रवाह गर्दै आएको राष्ट्रपति पौडेलको भनाइ छ। विधिपूर्वक व्रत सम्पन्न गर्नाले मनोवाञ्छित फल प्राप्त हुने, परिवारको कल्याण हुने तथा दुःख र कष्ट हटेर शुभ हुँदै जाने जनविश्वास रहेको उहाँले उल्लेख गर्नुभएको छ।

सन्देशमा भनिएको छ, “सूर्यबिना पृथ्वीमा जीवन सम्भव नरहने सन्दर्भलाई आत्मसात् गर्दै कात्तिक शुक्ल चतुर्थीदेखि सप्तमीसम्म जल प्रवाह हुने स्थानमा अस्ताउँदो र उदाउँदो सूर्यलाई अर्घ्य दिएर पूजा आराधना गरी यो पर्व मनाउनाले मानिसलाई प्रकृतिप्रतिको सम्मान, पर्यावरणीय चेतना तथा पारिवारिक र सामाजिक ऐक्यबद्धता प्रकट गर्न सहयोग पुग्छ।”

विशेषगरी तराई तथा मधेस क्षेत्रमा हर्षोल्लासपूर्वक मनाइने यो पर्व हाल काठमाडौँ उपत्यका लगायत देशका पहाडी तथा हिमाली जिल्लाहरूमा समेत व्यापक रूपमा फैलिनु अत्यन्त खुसीको विषय भएको उहाँले औँल्याउनुभएको छ।

अन्तमा, राष्ट्रपति पौडेलले यस पवित्र पर्वले नेपाली समाजमा विद्यमान सबै किसिमका सामाजिक विभेदहरूको अन्त्य गर्दै दिगो शान्ति, सुशासन, विकास र समृद्धिको लक्ष्य हासिल गर्न छठी माता र भगवान् सूर्यबाट सबैलाई प्रेरणा मिलोस् भन्ने कामना गर्नुभएको छ।