भक्तपुरका चारै नगरपालिकाका सम्पदालाई जोड्दै एकीकृत धार्मिक तथा सांस्कृतिक पर्यटन सर्किट निर्माण गरिने

भक्तपुर, कात्तिक २९ गते । भक्तपुर जिल्लाको एकीकृत पर्यटन तथा सांस्कृतिक सम्पदाको संरक्षण, प्रवर्धन र पर्यटकहरूको बसाइ अवधि लम्ब्याउने प्रमुख उद्देश्यसहित जिल्ला समन्वय समितिको अगुवाइमा ‘भक्तपुर धार्मिक तथा सांस्कृतिक पर्यटन सर्किट’ निर्माण गरिने भएको छ।

भक्तपुरभित्र रहेका सूर्यविनायक, मध्यपुर थिमि, भक्तपुर र चाँगुनारायण — यी चारै वटा नगरपालिका क्षेत्रमा छरिएर रहेका धार्मिक, पर्यटकीय तथा सांस्कृतिक सम्पदाहरूलाई एउटै सञ्जालमा जोडेर एकीकृत रूपमा प्रवर्धन गर्न यो अवधारणा अघि सारिएको हो। यसबाट स्थानीयस्तरमा रोजगारी सिर्जना हुने, स्थानीय उत्पादनको बजार विस्तार हुने र सबै नगरहरूको सन्तुलित विकासमा सहयोग पुग्ने विश्वास गरिएको छ।

जिल्ला समन्वय अधिकारी विसकसेन ढकालका अनुसार चारै वटा नगरपालिकाका आ-आफ्नै विशिष्ट विशेषता र सम्भावनाहरू रहेकाले ती सबैलाई छुट्टा-छुट्टै रूपमा भन्दा पनि समन्वय गरेर एकीकृत सर्किटको रूपमा विकास गर्दा निकै प्रभावकारी हुनेछ।

यसै क्रममा, सूर्यविनायक नगरपालिकाका प्रमुख वासुदेव थापाले आफ्नो क्षेत्रमा शिव मन्दिरहरूलाई जोड्ने ‘शिव सर्किट’ पहिल्यैदेखि सञ्चालनमा ल्याइएको र यसको स्तरोन्नति भइरहेको बताउनुभएको छ। सूर्यविनायकमा डोलेश्वर महादेव, आशापुरी, रानीकोट गढी, घ्याम्पेडाँडा लगायतका धार्मिक तथा प्राकृतिक स्थलहरू रहेका छन्।

त्यस्तै, मध्यपुर थिमि क्षेत्रमा बालकुमारी, सिद्धिकाली, नीलवाराही मन्दिर, जिब्रो छेड्ने जात्रा, शङ्खधर साख्वा:को पहिचान र माटाका भाँडा तथा मुखुन्डो निर्माणका कला प्रसिद्ध छन् भने चाँगुनारायण क्षेत्रमा विश्वसम्पदा सूचीमा सूचीकृत चाँगुनारायण मन्दिर, नगरकोट र पदमार्गहरू आकर्षणका केन्द्र हुन्।

ऐतिहासिक भक्तपुर नगरपालिका क्षेत्रमा दरबार स्क्वायर, न्यातपोल (पाँचतले मन्दिर), दत्तात्रय र परम्परागत काष्ठकला तथा हस्तकलाका उत्पादनहरू मुख्य विशेषताका रूपमा रहेका छन्।

होटेल सङ्घ बागमती प्रदेशका अध्यक्ष रामसुन्दर बकेले जिसस भक्तपुरको यो निर्णयले जिल्लामा आउने पर्यटकहरूको बसाइ लम्ब्याउन र समग्र पर्यटन उद्योगलाई चलायमान बनाउन महत्त्वपूर्ण भूमिका खेल्ने भन्दै यसको स्वागत गर्नुभएको छ।