पृथ्वी राजमार्गको घोप्टेभिरमा फेरि खस्यो सुख्खा पहिरो : अवरुद्ध सडक केही बेरअघि सञ्चालनमा

चितवन, कात्तिक २४ गते। पृथ्वी राजमार्गअन्तर्गत चितवनको इच्छाकामना गाउँपालिका–४ स्थित घोप्टेभिरमा पुनः सुख्खा पहिरो खस्दा अवरुद्ध भएको यातायात सेवा केही बेरअघि मात्र सुचारु भएको छ।

यसअघि सोमबार दिउँसो करिब आठ घण्टაको प्रयासपछि सञ्चालनमा आएको सो सडक राति पुनः पहिरो खसेपछि पूर्ण रूपमा अवरुद्ध बनेको थियो। जिल्ला प्रहरी कार्यालय चितवनका अनुसार सोमबार राति ११ः१० बजे सडकमाथिबाट सुख्खा पहिरो खसेको थियो, जसले गर्दा रातभर यात्रुहरूले सास्ती व्यहोर्नुपरेको थियो।

जिल्ला प्रहरी कार्यालय चितवनका प्रमुख प्रहरी उपरीक्षक रामेश्वर पौडेलका अनुसार पहिरो हटाएर यातायात सञ्चालनमा ल्याउन रातिदेखि नै अथक प्रयास गरिएको थियो। यसअघि सोमबार बिहान साढे ५ बजे पनि सोही स्थानमा पहिरो खस्दा करिब आठ घण्टापछि दिउँसो २ बजे मात्रै सडक एकातर्फी तथा दुइतर्फी रूपमा खुलेको थियो। लगातार भइरहेको पहिरोका कारण यस क्षेत्रमा तीन दिनदेखि पृथ्वी राजमार्गको यातायात पूर्ण रूपमा प्रभावित बन्दै आएको छ।

पटक–पटक सुख्खा पहिरो खस्ने र बाटो अवरुद्ध भइरहने समस्याले गर्दा यस रुट भएर यात्रा गर्ने यात्रु तथा सवारीचालकहरूले ठूलो सास्ती खेप्नुपरेको छ। हाल पहिरो पन्छाइएर बाटो खुले पनि सो क्षेत्रमा अझै पनि सुक्खा पहिरो खस्ने जोखिम कायम रहेकाले स्थानीय बासिन्दा तथा यात्रुहरूमा त्रास र चिन्ता अझै टरिसकेको छैन।

सम्बन्धित निकायले जोखिमयुक्त यस क्षेत्रमा स्थायी समाधानका लागि छिटो पहल गर्नुपर्ने माग स्थानीयवासीले गर्दै आएका छन्।